Le Camunos constituiva un communitate assatis homogenee, disseminate in plure gruppos e ligate inter lor mesme per interesses economic, per consuetudes religiose, ma anque per necessitates militar.
    Iste gruppos era formate de vinti - trenta individuos, probabilemente clanes familiar al ordines del plus vetule inter illes. Cata gruppo construiva su proprie domo, un sorta de parve ferma constituite per duo o tres cabanas e de un palissada pro le bestial; le toto era circumferite per un muro a sic (un muro sin calce). Iste nucleos era stabilite super colles e in le proximitate de torrentes pro haber aqua cuje necessitava pro lor vita domestic.
    Lor activitate principal era le chassa: al cervos, sed etiam al camoces, al vulpes, e al porcos singular; a vices, illes capturava etiam aves aquatic. Secundo le casos illes usava le lancea, le pugnal o le spada e a vices le "cateia", isto era un sorta de boomerang.
    Multe diffuse era le chassa con le retes o trappas. Un methodo, le qual ha pervenite usque a hodie, era illo de un lacio con nodo cursori, abandonate e ben mimetisate super le terreno e con le extremitates ligate a un ramo multo tendite. Quando le animal perveniva super le trappa, le mechanismo saltava, liberante le ramo in tension; le nodo remaneva altiate con le preda appendite per le gambas.
    Satis diffuse era le elevamento del bestial: canes, capras, oves, boves, cavallos, anates e porcos. Le bove como animal de traction, appareva intra le 2200 e le 1800 a.C. sed ille habeva su major diffusion in le successive etate del bronzo. Le cavallo ha facite su prime apparition in le tarde etate del bronzo, sed ille ha essite semper un animal multo rar, usate exclusivemente per chefes e guerreros.
    Pois, iste gente initiava a cultivar le terra pro facer fronte a nove necessitates. Con le foco illes aperiva vaste clarieras in le silva, in zonas non excessivemente scarpate proque in ille tempore le fundo del valle era plen de mariscos. Le Camunos comenciava a laborar le terra con aratros rudimentari, trainate per copula de boves. Le labor de aratura veniva in ultra completate per 
agricultores munite de sarculos in ligno. Illes fracassava le grosse turfs, nivellante le terreno pro render lo apte al semination.
    Assi surgeva in breve tempore, parve agros, circumscripte per murettos in le 
    vicinitate del villages fortificate. On non sape exactemente in alicun cosa illes cultivava, si cereales, verdura o plantas a fructo. Probabilemente un parte era destinate in pastura e fenation, pro nutrir le bestial durante le saison hibernal.

    Luca Ghitti