Salute omne!

Hodie in le Statos Unite nos honora le lucta pro
derectos civil del Negros (e alteres) con le die
feriate del anniversario de Martin Luther King, Jr.  Io
vole offerer vos un traduction de su discurso famose
"Io ha un sonio".

Vos pote leger le integre discurso a
"http://www.angelfire.com/ky/LeCorde/reading2.html .

Gratias,
Paul

... Io dice a vos hodie, mi amicos, que in despecto del
difficultates e frustrationes del momento, io ancora
ha un sonio. Illo es un sonio radicate profundemente in
le sonio american.

Io ha un sonio que un die iste nation eveliara se e
realizara le ver signification de su credo: "Nos
mantene iste Veritates esser evidente per se, que tote
Homines son create equal."

Io ha un sonio que un die sur le collinas rubie de
Georgia le filios de previe sclavos e le filios de
previe proprietarios de sclavos potera seder se insimul
a un tabula de fraternitate.

Io ha un sonio que un die mesmo le stato de
Mississippi, un stato deserte, suffocante con le calor
de injustitia e oppression,  se transformara a in un
oasis de libertate e justitia.

Io ha un sonio que mi quatro infantes vivera un die in
un nation ubi illes non sera estimate per le color
de lor pelle ma per le contento de lor character.

Io ha un sonio hodie.

Io ha un sonio que un die le stato de Alabama, le
labios del cuje governator son tosto guttante con le
parolas de interposition e nullification, se
transformara a in un situation ubi parve pueros nigre e
pueras nigre potera junger se le manos con parve pueros
blanc e pueras blanc e i insimul como sorores
e fratres.

Io ha un sonio hodie.

Io ha un sonio que un die cata valle se exaltara, cata
collina e monte se abbassara, le placias aspere
se facera plan, e le placias torte se facera recte, e
le gloria del Senior se revelara,  e tote carne videra
lo insimul.

Isto es nostre sperantia. Isto es le fede con le qual
io retorna al Sud. Con iste fede nos potera excavar
del monte  de despero un petra de sperantia.  Con iste
fede nos potera transformar le discordos tintinnante de
nostre nation a in un belle symphonia de fraternitate.
Con iste fede nos potera laborar insimul, precar
insimul, luctar insimul, vader a prision insimul, levar
nos pro libertate insimul, sapente que nos sera libere
un die.

Isto sera le die quando tote del infantes de Deo potera
cantar con un nove signification,
"Patria mie qu'es,
focar del liberes
cant' io de te.
Pais ubi patres cuba,
pais que pel'grinos ama.
Que tote monte resona
Liberate."

E pro America a devenir un grande nation isto debe
devenir ver. Dunque que libertate resona del
culmines del collinas de Nove Hampshire.  Que libertate
resona del montes forte de Nove York.  Que libertate
resona del Alleghenias intensificante de Pennsylvania!

Que libertate resona del Roccoses coperite de nive de
Colorado!

Que libertate resona del culmines curvaceose de
California!

Ma non solmente illo; que libertate resona de Monte
Petra de Georgia!

Que libertate resona de Monte Surveliantia de
Tennessee!

Que libertate resona de tote collina e tote monticulo
del talpa de Mississippi. De tote monte, que
libertate resona.

Quando nos lassa que libertate resona,  quando nos
lassa que illo resona de tote village e tote
urbetto, de tote stato e tote citate, nos potera hastar
ille die quando tote del infantes de Deo, homines
nigre e homines blanc,  judeos e  gentiles,
protestantes e  catholiches, potera junger se le manos
e canta in le parolas del vetule canta spiritual de
Negros, "Libere al fin! libere al fin! gratias Deo
omnipotente, nos son libere al fin!"




Angelfire for your free web-based e-mail. http://www.angelfire.com