Un altere conto de mi vita:

Hodie io lecturava a un classe in le rhetorico que studiava le topico del
"objectivitate" de un puncto de vista postmoderne. Io ha scribite in 1995
un articulo super iste subjecto in le jornal _Philosophy of Science_ (PS)
con le titulo "Le origines metaphoric de objectivitate, subjectivitate,
e conscientia in le perception directe del realitate".  Titulo multo
impressive, nonne?  Actualmente illo esseva un parodia del titulo de un
libro per Julian Jaynes, "Le Origine del Conscientia in le Collapso del
Mente Bicameral".  Mi objecto esseva a discuter su interessantissime
thema que le conscientia es un metaphora , e a adder que le idea del
objectivitate es anque un metaphora, que esseva le thema de mi lectura hodie.

Mi argumento esseva que le perception synthesisa le gradientes de stimulation
sensori presentate al perceptor o simultaneemente o inter multo breve
intervallos temporal directemente a in le superfacies e formas de objectos
in un mundo extendite.

De plus, sequente le psychologo J. J. Gibson, le perception involve
simultaneemente processos exteroceptive e proprioceptive. Le objecto non
pote exister sin le conscientia del subjecto.  Subjecto e objecto es
inseparabile aspectos del mesme schema.  Le objectos es invariantes in
le campo perceptual distinguite del effectos del observator in su actiones,
movimentos, medios de observation.  Tote le sensos presenta information e
exteroceptive e proprioceptive.  Per exemplo, vision presenta information
super le movimento del observator verso o desde un objecto, per le
expansion o contraction de punctos super le superfacies del objecto
secundo lineas radiante de un puncto verso o del qual le observator se
move. Quando on move le capite le objecto remane in su position ben que
in le campo visual illo es ora locate a un nove loco. In le interim le
objecto ha movite secundo lineas in le direction opposite del movimento.
Quando iste movimento del capite es attribuite al observator (per essente
coordinate a movimentos voluntari e lor effecto factorisate del campo
visual), le objecto es percipite invariante in su position. Le detalios
de isto non es importante.  Lo que es importante es que le processo de
perciper un objecto require simultaneemente le perception del effectos
del subjecto.  Isto es un schema que contine e un objecto e un subjecto,
le subjecto essente le observator cuje movimentos e actiones explica
certe formas de variation in le campo visual independente del invariantes
que es le objecto.

Post haber constate isto, mi sequente puncto esseva que secundo certe
linguistas (George Lakoff) e scientistas cognitive, como Julian Jaynes,
e philosophos como Mark Johnson, le pensata conceptual es generalmente
extendite a nove dominios per medio de metaphoras, que le metaphora non
es solmente un phenomeno linguistic, mais conceptual, cognitive, del
pensata. Jaynes argueva que quando humanos incontra un nove phenomeno,
illes essaya comprehender lo in terminos de cosas familiar a illes,
e illes projice super le nove phenomeno formas e schemas del vetere
cosas regardate como similar al nove in certe vias.  George Lakoff,
linguista al Universitate de California argue que le metaphora es un
function de elementos de un dominio a elementos de un altere. Le
metaphora organisa le nove dominio per medio del schema prendite del
vetere.

 Assi on pote dicer que le amo inter  duo personas
es como un viage. Lor relation es conceptualisate como un viage. A certe
tempores on possibilemente va dicer que lor association es al fin,
ha venite al fin del strata.  O si illes persister in vader in le
maniera que illes vade, illes va perder le via, e illes debe retornar se
al cammino directe.  O illes va retrospicer e dice "Vide como distante
nos ha venite!"  O possibilemente illes debe facer un decision super
lor futuro, e illes es a un incruciata, un via transversal in le cammino.
Possibilemente illes va vader in directiones differente post isto.

Le function inter le relation del amo inter le amantes e le viage es
multo structurate. Il ha correspondentias ontologic, secundo le que le
entitates in le dominio del amo (e.g., le amantes, lor objectos commun,
lor difficultates, le relation del amo mesme) corresponde systematica-
mente a entitates in le dominio de un viage.

Brevemente:

LE FUNCTION DEL VIAGE AL AMO
  Le amantes coresponde a viagiatores.
  Lor relation de amo es un vehiculo que les porta.
  Lor objectos commun corresponde a destinationes in le viage.
  Difficultates in lor association coresponde a impedimentos e obstaculos
   in le viage.
  Le resistantia de lor relation al obstaculos es mesurate per le
   distantia illes ha viagiate.
  etc.

Il ha multe tal metaphoras, e milles de illes ha lor origine in
schemas del incorporite experientia.  Per exemplo, il ha le schema del
reseptaculo. Le receptaculo ha un limite que distinque interior de
exterior.  Iste schema defina le distinction basic inter "in" e "ex" (o "de").
Nos jam comprehende nostre corpores como receptaculos, proque le
cosas le plus basic que nos face es a ingestar e excretar, inhaler le
aere e exhaler lo.  Lakoff nota nonobstante que nostre vitas quotidian
es plen de experientias nos characterisa in terminos del receptaculo,
de in e ex.  P.e. on se evelia (*exvigiliar) DE su somno, emerge DE su
stupor e ambula IN un esturdimento IN le camera del banio.  On pone le
dentifricio DE su tubo, pone le brossa de dentes in su bucca, etc..
E considera le numerose parolas del latino que ha ex- e de-, e in- in
iste senso.

Per exemplo on pote conceptualisa le campo visual usante IN e EX o DE,
i.e. le campo visual es como un receptaculo.

"Io ha ille IN mi vision."  "Ille es ora foras mi vista".  Illo es in
le centro de mi vision.  Multe evenimentos es tractate metaphoricamente
como receptaculos. P.e., "Ille es EXcludite del cursa".  Illa es
acceptate a in su sororitate.

Ora, a terminar isto jam troppo longe essayo, io argue que le schema del
subjecto-objecto de perception deveni illo mesme un metaphora pro tractar
multe problemas conceptual in le scientia.  Le objectivitate non es
super le objectos de directe perception, mais conceptos que synthesisa
diverse experientias o datos obtenite a tempores differente. O in le lege
le judico essaya facer su judicamentos objectivemente.

Io ora vade a IMmerger me in le somno.

Stanley Mulaik