Il pare que Kjell es obsedite pro le tempore e le temperaturas. Ille non es le unic, proque io ipse ha un obsession simile. Nonobstante, io pensa que ille esserea surprendite pro le climate de Pamplona. Mi urbe recipe 900 mm. de pluvia cata anno. In iste mense le pluvia ha essite constante. Nos dice in espaniol: "abril, aguas mil", e illo es ver in Pamplona.
In re le temperaturas... Qualcunque es possibile hic. Io ha cognoscite un die de 42º  in 1982 (illo es completemente anormal, totevia) e un altere de -13º (illo es anque anormal, ma le persona vetule garanti que illo esseva normal ante 40 annos).
Generalisante, io pote dicer te que nostre climate in hiverno es multo similar al del medietate del sud non mediterranee de Francia, e mesmo al del sud de Anglaterra. Le primavera es folle: quando tu gaudevas del 20º de Uppsalla, nos habeva 12º. Nos ha un altere proverbio pro expresar isto: "hasta el 40 de mayo no te quitarás el sayo" ("usque le 40 de maio tu non te quitara le tunica -sagum-", plus o minus). Io non sape proque io mentiona tante proverbios. Usualmente io los detesta.
Le estate es un altere cosa. Mi opinion es que illo es in-sup-por-ta-bi-le. Camino, mi amica, pensa como io, ma pro rationes differente: io odia le calor suffocante, e illa affirma que in Pamplona le estate es (sic) "una mierda", proque illo dura quatro dies (un expression local: "bah, pero si el verano en Pamplona dura cuatro días...").
Io amarea cognoscer plus feminas (naturalmente, dicera vos). Ehem. Io volerea cognoscer plus feminas ab altere paises pro saper si illas pensan como le "mulier pampilonensis": que le calor nunquam es bastante. Ma, ubi es le feminas qui parla Interlingua?

Ignacio Martínez Recari
[log in to unmask]