Le titulo sembla alluder a un specie de joco a cartas de infantes. Aleksandra Marinina sembla esser le regina de romanos criminal in le Russia hodierne. Per hasardo legente le ultime capitulos in su libro io audiva que illa es etiam traducite a svedese e italiano. Nostre radio habeva mesmo un intervista con illa. Certo isto non es Le Grande Belle Litteratura, ma il es amusante leger un narration que occurre in nostre tempore. Pro me, un russocomprendente, su lingua sembla multo moderne, e comenciante leger le libro io me demandava, pote on leger non importa qual libro como un specie de documentario in re le pais in question. A saper, toto comencia con un nove chef del section protocollari que sembla esser ligate con le intelligentia anticriminal. Iste nove chef es un maniaco de ordine, ille netta le camera de su subalternos, ordina le documentos sur lor tabulas scriptori e pote dar bon consilios in omne cosas del vita quotidian. Io pensa "un tal chef non poterea functionar in un administration svedese". Ma ille non es normal. Ille fini como victima de un assassinato, e ille es per hasardi implicate in un grande affaire de defraudation... Hah! le lector pensa, proque ille non sape illo del commenciamento, le personela naturalmente ha occidite ille. Forsan alcuno ha sentite que suffice, un chef que se interessa in toto, non solo le labor, ma le vitas private, detaliemente del labor del subalternos, non pote functionar plus. Alcuno de illos ha habite un attacco de mal autocontrolo e ha occidite le. Ma non, le cosa es plus interessante. Le assassino es un altere. Forsan il es le detectivo policial Dmitrij Platonov. Ille debe celar se e trova un sol femina, Kira Levchenko in le metro, con qui ille va al appartamento de illa. (Le lector attende un orgio de sexo, sed nostre fugitivo vole usar le femina como messagera, telephonante al personas qui pote adjuvar le). Un importante persona in tote iste intriga es etiam le analysator Nastia Kamenskaja, qui es cognoscite de haber un cerebro como un computator... Io non es un grande affectionate del romanos criminal (detective on dice in alcun paises e policial in alteres), ma Marinina es interessante. Lo que me sempre fascina es como omne le personas ha un faciada sin reproche, ma detra, post, iste faciada il ha omne iste insufficientias del quales nostre vitas es plen, e Marinina demonstra isto multo habilemente. Ma que es le intriga. Toto es un assassino qui occide personas quasi hasardemente pro qualificar se de esser un ver assassino pagate, e le scandalo de un entreprisa, exporto de metallos nobile (auro, platina) al occidente es un altere ingrediente. In fin quasi le medie de Moscova es mixite in le historia, e toto fini per un auto in le qual un bomba es inserite... Le edition russe que io legeva ha un pictura de un Femina fumante e un mano que tene un cultello, in le action de tranchar le corda del receptor de un telephono. Iste imagine ha nulle fundo in le libro. Il ha nulle tal situation in illo e illo es certo ibi solmente pro facer le libro vender se melio! Ma Marinina merita le interesse de lectores etiam extra Russia. E habente legite alcun libros de phantastica scientific que io ha comprate (in svedese) io va jectar me a leger le sequente libro que io ha: Nje Meshajtje Palachu (Non disturba le carnifice!). In le copertura il ha un pictura de un belle femina jacente e un viro multo proxime, tenente un pistola dirigite verso un altere direction a un puncto quasi detra su capite de ille. Per consequente le pistoletta sembla haber un rolo plus tosto choreographic in le imagine.