Al amicos in le gruppo INTERLNG e a altere lectores de messages in Interlingua, le secretario de Societate Svedese pro Interlingua desira FELICE NATAL e BON ANNO NOVE. Post un anno non troppo successose pro Interlingua con multe problemas nos expecta nove initiativas, recrutamento de nove membros, nove affluentia de collaboratores active. (Il es possibile que non mesmo tote le lectores de iste lista es membros de UMI pagante abonos a Panorama sur papiro...) Cata dollar, franco, florino, lira e corona donate al cassa de UMI, o al compra del libros jam producite, es importante pro facer possibile que le voce de Interlingua sia audibile e que nove libros sia publicate. Nostre sperantia es que le 14-e Conferentia International in Focsani, Romania, va "recargar nostre batterias"! Durante tal incontros multinational le lingua v i v e ! Florin e Simona labora diligentemente e expecta etiam t u participation! E non time que le participantes de 15 o 16 nationalitates parlara como menacia Stan quando io diceva "Tolera optiones [in le pronunciation], sed non RECOMMENDA los!!!" (Stan): "Il non es un question de recommendar los o non. Le anglophonos va parlar con lor proprie accentos si o non on non exhibi le optiones." Le experientia monstra que anglophonos (qui non vole recurrer al anglese..) se adapta al pronunciation quasi standardisate como tote nos alteres. In Strasbourg p.ex. participava un americano, qui veniva como novicio total. Post duo dies ille explicava a nos cosas technic complicate del Internet in un linguage clar e distincte, con le pronunciation que nos considera "international" sin interferentia de su lingua maternal, que haberea potite causar difficultates al comprension. In ultra iste senior captivava nostre interesse per formulationes eloquente que jam ha devenite dictos in nostre communitate: "Nos non debe parlar multo d e Interlingua: illo parla pro se mesme." Un altere anglophono, Donald G. de Hongkong, io volerea qualificar como un modello del pronunciation international. (Le intonation naturalmente varia inter parlatores de nationes diverse, sed il se tractava in le discussion del pronunciation de sonos.) Pardona me iste digression! Io gardara le silentio quando possibile. Il ha troppo de cargas importante a exequer pro le d i f f u s i o n de Interlingua - regrettabilemente ancora un 'lingua ignota'. sed digne de esser cognoscite. De accordo de isto? Sta ben, omnes! Que nos habe pace e prosperitate in tote le mundo! Amicalmente, Ingvar Ingvar Stenström, Vegagatan 12, S-432 36 Varberg, Sved o ia Tel. +46-/0/340-15053 <[log in to unmask]> <[log in to unmask]> <[log in to unmask]> <http://www.interlingua.com>