Paolo, Io vole junger mi voce con les de Paul, Kjell, Stan, Jay, et alteres per demander (ma "demander" in le senso polite francese, non le senso abrupte anglese) que tu offerera le textos archivate in un formata ascii (pur texto). Io personalmente non ha problemas con archivos in Word 6; io es ancora un sclavo de Microsoft - si, un Microserf - proque Windows/Office97 es le selection automatic del majoritate de mi clientes. (Re Microsoft, io es toto in accordo con le opiniones de Steinar, sed etiam plus fortemente. Plure vices io ha debite travaliar usque 3 horas a.m., a causa de lor productalia maledicte.) Nonobstante, mi prejudicio (ben justificate) contra Microsoft non es le ration pro mi demanda. Plus tosto, io opine que nostre archivos debe esser accessibile al maximo grande numero de personas, anque illes que non possede le plus moderne computatores e software. Il debe haber milliones de tal personas: studentes, habitantes de paises minus ric, hobbyistas qui non pote justificar a se le comprar de un sistema professional, etc., etc. Inter istos es milles de interlinguistas potential. Ascii es, a mi aviso, le sol formata accessibile per omnes. In plus, io non vide un besonia pro usar un formata plus "ric": le textos que io ha discargite ex le sitos de UMI e de Paolo monstra nulle typographia complicate. Illos es quasi pur texto, plus or minus. Super le demanda de Paul, que cata paragrafo debe se interpunctar con caracteres "fin-de-linea", io non es secur. Il me sembla le major parte de gentes prefere lor documentos "pur-texto" sin tal delimitatores. Ma io non oppone un tal formata, a condition que on insere un linea blanc inter cata paragrafo. Concernante altere formatas "aperte", io opine que PostScript es plus tosto un cosa pro le computatoristas experte. RTF serea dunque un melior selection, si un formata "ric" es necesse. (Illo es un formata "aperte" ex Microsoft que conserva quasi tote le formatatura de un documento Word, ma pote esser legite per previe versiones de Word e per multe programmas non-Microsoft.) Io comprende que le reformatar de archivos poter esser un travalio innegligibile. Si tu vole, io serea preste a facer isto - proque io non ama esser uno de illes que sempre criticisa cosas, sin adjutar a lor melioration. Amicalmente, Chris