On Sat, 2 Nov 2002 19:00:05 +0100, un articulo esseva inviate includente le sequente: >English is spoken by at least 55% of EU citizens. Nederlandia ha le reputation de esser un pais cuje inhabitantes parla ben le anglese. Isto pote esser ver in papiro; totevia nostre experientia es toto altere. Mi amate Marie, un immigrante de Svedia qui non parla ancora activemente le nederlandese, incontra regularmente difficultates de trovar personas in botecas, edificios public, etc. con un commando del anglese sufficiente pro poter servir la. Nostre experientia le plus surprendente occureva in le Hospital Academic in Groningen ubi nostre filia Cassandra ha nascite. Isto es un hospital con un multo bon reputation, e nos ha trovate le servicio excellente in general. Nonobstante, non solmente le majoritate del infermeras habeva difficultates prohibitive de usar le anglese, anque un doctor qui esseva in carga del preparationes pro le nascimento non esseva capace de producer un singule phrase in anglese! E ista esseva un medico con un grado academic, e illa non habeva le aspecto plus vetule que trenta annos! Il existe de facto personas in Nederlandia capace de producer plus de tres parolas in anglese in un conversation, mais illes forma nullemente un majoritate in mi experientia. Isto illustra que le "cognoscentia" del anglese non implica alicun capacitate real de *usar* lo - un puncto essential toto sin representation in le statisticas. Il pare ben plausibile que le situation esserea radicalmente plus bon si Interlingua o mesmo Esperanto esseva le lingua international dominante. Il es multo plus facile attinger un commando active de iste linguas. - Martijn