(Petio Angelov era mi prime correspondante in Interlingua, il ha un mense), Ora io es un membro de U.I.F. e de U.M.I. Io ha notate in INTERLNG que le membros del coolista se tuteava (se tutoyaient). Dunque io propone que anque nos nos tutea. Io es multo plus vetule que tu in annos de vita, ma tu es multo plus vetule que io in annos de practica interlingual. Pro facilitar le « tu » on pote forsan acceptar iste ancianitates como equivalente. Io habeva scribite: io crede que un presentia interlingual le plus multinational possibile es desirabile in INTERLNG e que omne voces son preciose ! Io repete e confirma iste parolas, ma io adde que un tanto juvene presentia es ancora plus desirabile e preciose e io crede que tu messages in INTERLNG, si il te place, serea duplemente preciose, proque tu es juvene e proque tu es bulgare. INTERLNG es un vitrina moderne aperte a omne internautas, un diamante particularmente attractive que pote convincer multes in favor de Interlingua. Cata cultura, cata generation, cata nationalitate representate adde a su credibilitate. Amicalmente, Jacques.