Mario ha scripte (Re: Vamos nos al plagia): >Italia era Magna Grecia antea de esser roman. Si, ma non tote le peninsula: solmente le regiones litoral del sud era appellate "Magna Gręcia." Le grecos ancien era un populo maritime e ha fundate lor colonias (citates extra Grecia) proxime al costas, non solmente in Italia ma alsi in Ionia (le west de Anatolia), in le nord de Africa, in Sicilia (que etiam habeva multe colonias punic*) e in Francia e Hispania: Marseilles era originalmente "Massalia," un citate grec, e Cadiz alsi era fundate per le grecos, qui lo ha appelate "Gades." In Italia, como in Ionia e in le est de Sicilia il era multe citates grec, includente Neopolis, cuje nomine significa "Nove Citate," e hodie es appellate "Napoli" in italiano e "Naples" in anglese. Un altere citate importante de Magna Gręcia era Crotona, le centro de pythagorismo, ubi Pythagoras ha fundate su societate fraternal (nonobstante que ille mesme ha nascite in le insula de Samos) e ubi ille viveva le major parte de su vita. Como un vegetariano, io ha un identification con le vegetarian fraternitate de pythagorismo. Ma io ha legite heri in le libro "Courtesans and Fishcakes," que mi amica Maria ha date a me recentemente (thanks, Mary!), que illos al vices ha participate in le ritos sacrificial e in le mangiar del carne postea; le obligation religiose era troppo importante, e mesme le pythagoristas non poteva omitter lo. Io non era felice discoperar isto--ma il es possibile que le autor es incorrecte, ille dice que il non ha multe evidentia del qual nos pote saper iste detalios. Un altere restriction in le vita pythagoric era le prohibition de prestar juramentos. In iste le pythagoristas simila le quakers e le judeos. Nos judeos non presta juramentos; mesmo in contextos legal, por exemplo in esser inaugurate al Juratos Grande, io--e milliones de alteres--non "presta" ma "affirma." -Julio le Afikoros (e alsi un ex-studiante del historia ancien, mi "major" a Columbia University) *Le parola "punic" es derivate del latin "poeni," significante "le phenicios," i.e. le carthagineses. Phenicia, naturalmente, es plus o minus le area del moderne Libano, ma Carthago (in le moderne Tunisia) era un citate phenicie alsi; como le grecos, le phenicios ha fundate citates in varie regiones mediterranee, includente non solmente Tunisia ma alsi Sicilia e Hispania. A proposito, le pais "Phenicia" e le ave mythic "phenice" ha nomines cognate. Le Interlingua-English Dictionary es vermente un fonte magnific: le IED ha "Pythagoras," "pythagoric," "pythagorismo," "pythagorista," "Carthago," "carthaginese," "Phenicia," "phenicie," e "phenicio." Viva le IED!