Salute,

Como Péter ja annunciava, in le edition currente de Radio Interlingua 
se trova un interview con me a proposito del handicap neurologic 
autismo.

Isto es un bon occasion pro informar vos de un cosa connexe a isto. 
Io es membro del committee de organisation de Autscape, un 
conferentia/refugio pro personas con autismo o conditiones similar, 
organisate cata anno in Anglaterra. Le majoritate del audientia es de 
Grande Britannia ma il ha tamben visitatores de Nederlandia e alcunes 
de altere paises. Dunque, il es natural que le lingua de labor es le 
anglese.

Le conferentia es *pro* personas con autismo e interessatos, ma non 
tote le sessiones es necessarimente *super* autismo. Assi, durante le 
ultime Autscape (2009) io conduceva un seminario super interlingua 
pro le interessatos, e le interesse esseva plus grande que io 
expectava. Io ha le intention de repeter e augmentar isto a Autscape 
2010.

Como parte de isto io presenta hic infra le "Invitation a presentar 
propositiones" de Autscape, traducite in interlingua, pro dar vos un 
idea de lo que Autscape es.

In ultra, il es possibile que existe personas inter le membros de 
INTERLNG qui ha interesse in autismo ab un perspectiva personal o 
professional. Nos esserea aperte al possibilitate de un discurso, 
activitate o seminario pronunciate in interlingua; in tal caso, io 
esserea personalmente responsabile de facer tote le traduction 
necessari.

Si il existe un persona inter vos qui haberea interesse in pronunciar 
un discurso o organisar un activitate a Autscape que es interessante 
pro un publico que consiste primarimente de personas *con* autismo e 
altere conditiones similar, per favor lege ben lo sequente, e 
contacta me pro ulterior informationes. Il es essential que vos 
comprende ben le scopo e philosophia de Autscape! Le texto hic infra 
pote dar vos un idea, e il ha multe altere informationes in le sito 
web mentionate (in anglese).

Nota ben: io non pote promitter que alcun proposition sia acceptate! 
Tote le committee face iste decision, a base de nostre criterios de 
qualitate e de relevantia a nostre audientia; io personalmente non ha 
plus de un sol voto.

- Martijn, coordinator del programma pro Autscape 2010


AUTSCAPE 2010: BENESSER AUTISTIC
Martedi le 10 de augusto - venerdi le 13 de augusto 2010
Radstock, Somerset, Regno Unite
http://www.autscape.org/

INVITATION A PRESENTAR PROPOSITIONES

Data limite: lunedi le 15 de martio 2010.
Formulario de submission: http://www.autscape.org/proposals/proposalform

Per favor distribue amplemente.

____ Contento _________________________________________________

- Que es Autscape?
- Lo que nos cerca
- Thema
- Audientia
- Exemplos
- Seminarios non verbal
- Qualque notas de precaution
- Que expecta nos de te?
- Que pote tu expectar de nos?
- Como submitter tu proposition

____ Que es Autscape? _________________________________________

Autscape es un conferentia con un differentia. Nos non parla super le 
autismo pro un audientia primarimente non autistic. Al contrario, 
iste conferentia es organisate specificamente per e pro personas 
autistic. De facto, in alcun partes non es parlate super le autismo 
del toto! Le personas non autistic es equalmente benvenite, ma le 
ambiente e le contento del evento es concentrate super le 
necessitates, interesses e sensibilitates de personas autistic.

____ Lo que nos cerca _________________________________________

Nos accepta ora propositiones pro discursos e seminarios a presentar 
a Autscape 2010. Per favor non submitte in iste momento propositiones 
pro presentationes per affiches, gruppos de recreation, videos, 
discussiones e altere sessiones. Nos cercara istes in le proxime 
futuro. In iste momento nos cerca primo discursos e seminarios.

____ Thema ____________________________________________________

Le thema de Autscape de iste anno es "Benesser autistic" ("Autistic 
Wellbeing").

Description del thema:
Le autismo es troppo frequentemente presentate como maladia o 
disturbantia con solmente aspectos negative. Ma a Autscape 2010, nos 
vole discuter, disveloppar e divulgar strategias pro esser autistic E 
esser in bon sanitate. Le presentationes pote coperir topicos como le 
processamento sensorial e de information, sanitate physic e mental, 
satisfacer le proprie necessitates, esser productive, interaction 
social, e construction de communitate.

Le presentationes que cerca disveloppar le thema de "Benesser 
autistic" habera prioritate in nostre consideration.

Nos desira explorar un ample varietate de perspectivas super esser 
autistic in multe manieras diverse. Isto pote esser facite per 
discursos formal o per seminarios, e pote esser theoretic o practic. 
Multe diverse typos de contribution es benvenite: discursos 
traditional, expression creative, activitate physic, seminarios 
interactive e plus.

____ Audientia ________________________________________________

Ben que nos da le benvenita a professionales e membros de familia non 
autistic, iste evento es primarimente pro personas autistic, non 
super personas autistic! Le seminarios dirigite a parentes e 
professionales pote esser acceptate, ma debe esser positive in lor 
acceptation de personas autistic e de nostre derecto de esser 
differente.

____ Exemplos _________________________________________________

Pro alcun exemplos de lo que ha essite presentate a Autscape in le 
passato, vide le presentationes del anno passate (in anglese) a:
http://www.autscape.org/archive/2009/presentations

Altere exemplos de contributiones que esserea probabilemente 
acceptate in Autscape es illos presentate a Autreat in le Statos 
Unite. Vide: http://www.ani.ac/

____ Seminarios non verbal ____________________________________

Ben que multe personas autistic attrahite a un evento como Autscape 
es multo verbal, alteres pote haber difficultate con un evento assi 
concentrate circa le linguage. Nonobstante, nos vole acceptar e 
includer completemente tote le typos de personas autistic, mesmo le 
personas minus 'loquace'. Nos cerca tamben seminarios que non se 
concentra primarimente super le parola parlate. (Le presentatores 
pote sempre usar le parola; isto solmente non es le contento 
principal de iste typo de seminario.) Exemplos: dansa, relaxation, 
musica, arte, construction. Iste seminarios es differente del 
sessiones de recreation informal proque illos ha plus de structura, 
preparation (del presentator), relevantia al autismo e al thema del 
evento, e duration.

____ Qualque notas de precaution ______________________________

* Curation:
Le seminarios super le curation o prevention del autismo 
probabilemente non essera ben acceptate e il es melior evitar los, al 
exception de illos presentate ex un puncto de vista de defensa del 
proprie interesses como persona autistic.

* Problemas:
Le discussion de como personas non autistic pote remediar problemas 
con personas autistic pote, mesmo sin intention, reinfortiar le 
attitudes negative.

* Experientia personal:
Nos ha totes le experientia personal de autismo. Si tu presentation 
tracta primarimente de tu experientia personal, considera ben le 
relevantia de illo a iste conferentia; tu historia personal debe 
esser un que pote adjutar le personas presente a discoperir un nove 
comprension de lor proprie situation. Per favor explica a nos lo que 
le audientia pote ganiar de tu presentation.

* Pertinentia:
Omne session, non importa le gruppo visate, debe esser pertinente pro 
un audientia de personas autistic e non debe causar le sentimento de 
esser objectificate o humiliate.

____ Que expecta nos de te? ___________________________________

* Presentia:
Si tu submitte un proposition, nos expecta que tu essera presente! 
Per favor sia preparate de assister a Autscape e pronunciar tu 
discurso al die e tempore programmate. Si tu opta pro non assister a 
Autscape durante tote le 3 dies, nos nos effortiara pro adaptar le 
programma a tu necessitates.
Le viage es le responsabilitate de cata presentator individual. Nos 
non pote subventionar a alcun persona le viage o altere expensas non 
directemente connexe a Autscape. Si tu proposition es acceptate, nos 
es preparate de inviar te un littera formal de acceptation si isto 
pote adjutar te a levar tu proprie financiamento.

* Gruppos de discussion:
Le presentatores es incoragiate de ducer un gruppo de discussion 
super lor topico durante le vespere o postmeridie, pro le 
participantes qui desira un exploration ulterior del material 
presentate. Si tu ha problemas con isto, nos tentara cercar un 
voluntario pro adjutar te.

* Materiales de tu presentation:
Per favor invia copias de omne documentos e presentationes 
computatorial (p.ex. PowerPoint) in avantia. Istes essera rendite 
disponibile al participantes de Autscape pro telecargamento e 
impression.

* Archivo:
Nos volerea includer le summario de tu presentation, tu biographia e 
omne documentos electronic que tu ha fornite in le area archival de 
nostre sito web.

* Registration:
Per favor permitte que nos filma o alteremente registra tu 
presentation. Autscape pote render iste registrationes disponibile a 
altere personas. Alcun participantes pote tamben registrar 
presentationes pro lor uso personal. Si tu submitte un proposition, 
nos assume que tu accepta isto. Si tu ha questiones o objectiones, 
per favor face nos lo saper, e nos potera discuter lo.

____ Que pote tu expectar de nos? _____________________________

* Presentia:
Le presentatores essera allogiate in le centro conferential pro le 
die de lor presentation includente le nocte precedente o sequente. 
Solmente un placia pote esser subventionate pro cata presentation, 
independentemente del numero de presentatores. Infelicemente, nostre 
situation financiari non permitte offerer participation gratuite a 
tote le Autscape de iste anno.

* Participation:
Quandocunque tu non te occupa de tu presentation, tu pote beneficiar 
del evento, de altere sessiones e del sito conferential como le 
altere participantes.

* Collaboration:
Si tu te uni a nos, tu habera le opportunitate de collaborar in le 
formation de un evento de autodetermination e communitate autistic 
emergente. Il habera opportunitates al evento de participar in le 
futuro de Autscape.

* Audientia:
Un rar opportunitate de esser audite per un grande numero de personas 
autistic. Un chance de haber influentia e de reciper reactiones del 
personas le plus importante in le campo del autismo: personas con 
autismo.

____ Como submitter tu proposition ____________________________

Pro submitter tu proposition, per favor usa un del optiones sequente:

      * formulario in linea: http://www.autscape.org/proposals/proposalform
      * e-mail: [log in to unmask]
      * o posta a: Autscape, 24 Anson Road, Upper Cambourne,
        Cambridgeshire, CB23 6DQ, United Kingdom.

Tote le propositiones debe esser recipite ante lunedi le 15 de martio 2010.

Per favor include le sequente informationes.

     1. A PROPOSITO DE TE
          a. Nomine
          b. Pais
          c. Al minus un de:
                - adresse de e-mail (preferite)
                - numero de telephono
                - adresse postal
          d. Experientia (Un summario de tu experientia relevante, includente
             omne presentationes o altere activitates de instruction/defensa
             alterubi, e le natura de tu interesse in autismo e/o in
             questiones general super handicaps.)

     2. INFORMATIONES PRO LE PROGRAMMA
          a. Tu nomine o pseudonymo (pro uso public)
          b. Biographia (50-100 parolas)
          c. Titulo del presentation (1-12 parolas)
          d. Summario (50-150 parolas)

     3. A PROPOSITO DE TU PRESENTATION
          a. Typo de session (selige un)
                - Discurso (le audientia principalmente ascolta)
                - Seminario (le audientia participa verbalmente)
                - Activitate (le audientia participa physicamente)
                - Altere (per favor describe)
          b. Que es le relation inter tu presentation e le thema de iste
             anno, 'Benesser autistic'?
          c. Per favor describe tu presentation o activitate pro le
             decisores.

     4. Altere commentos non tractate hic supra

(end)

--
Archivos e disabonar: http://listserv.icors.org/archives/INTERLNG.html