Car amicos,

Multe gratias, Anne, pro tu correction de mi littera super le parolas
con "ka" in francese. Il se monstra que le question es multo plus
complicate e anque multo plus interessante. Anne ha ration. Anque
mi addition que dice que il ha ancora tres alteres fontes importante pro
le parolas francese con "ka", presenta lo in un forma troppo simple.

Hodie, durante un quarto de hora, io ha consultate mi  "Petit Robert".
Alora io ha trovate que, ultra le fontes que Anne ha addite, il ha ancora
plure altere parve fontes de iste categoria de parolas, p.e.
A. hebreo: cabale
B. nederlandese: cabillaud (kabeljauw), cambuse (kombuis)
C. anglese: cablogramme, camping, canif
D. lingua aztec: cacahouete, cacao
E. germano: came (Kamm)
F. greco: cachectique, cacaphonie, calligraphia, canephore, calomel
H. lingua infantin: caca

Il es interessante que multe parolas de iste sorta es anque parolas de
interlingua, dunque parolas international.

Il es possibile que forsan le altere membros de nostre lista non es
troppo interessate in le subjecto tractate. Ma io es grate a Anne qui
me ha incitate a (re)studiar un subjecto captivante. A curte distantia de
mi casa io ha accesso al enorme bibliotheca del Instituto Francese (parte
del universitate de Utrecht). Illac io va poter obtener le libro "Les
italianismes", que Anne mentiona. Gratias!

Salutes amical de Piet