LE CURVA IMPOSSIBILE
Cientistas succede obligar le luce, que sempre ambula in linea recte, a
facer curvas de 90 grados intra un crystallo. Es superate plus un del
grande barrieras de Physica.

Desde quando illos esseva discoperite, in 1897, le electrons deveniva
indispensabile. Sin illos, il non haberea telephonos, radios, computatores,
e un infinitate de altere inventos que solo existe perque le electrons pote
esser guidate per le homine, intra le filos, con grande precision.

De lor latere le photons, le particulas de luce, protagonistas de iste
reportage, non accepta le bridas del electrons e resiste, con tenacitate, a
cambiar de direction. Le prime medio efficiente de dominar los ha surgite
in 1970. Esseva le fibras optic, longe tubulos de vitro, reflexive per
intra, in le quales le photons curre disciplinate. Mais, si le fibra face
un angulo recte in un distantia minor que 20 millimetros, le particulas
escappa per le parietes de tubo.

Iste anno, le genios del Instituto de Technologia de Massachussetts (MIT),
in Boston, Statos Unite, inventava un solution pro le problema. Illes
discoperiva como pilar alcun poc atomos del elemento chimic silicium a
maniera de crear un barriera intransponibile. Con iste pilas, que le
photons batte ma non transversa, ha essite possibile construer un canaletto
sensational. "Intro illo, le luce ha facite lo que pareva impossibile",
diceva le physico canadian Pierre Villeneuve, del MIT. "Illo ha facite un
angulo de 90 grados in a pena 1 millesimo de millimetro."

PRO RUMPER LE MONOPOLIO DEL ELECTRICITATE

Volante in le fibras optic que connecta telephonos, TV a cablo, e retes de
computatores per le mundo tote, le luce transmitte 1 milliardo de bits per
secunda, mille vices plus que lo que le electrons porta intra le chips.
Basta isto pro imaginar le poter del photons, particulas que compone le
radios luminose. Ben, iste fragmentos brillante se prepara pro rumper le
monopolio del electrons e prender lor loco in tote le apparatos que utiliza
circuitos electronic.

Le cambio deveniva viabile, iste anno, con le discoperta de un crystallo de
silicium que manovra le photons con precision. In relation al fibras optic,
le major avantage del nove pecias es le grandor, pois le primes es troppo
grande. Ben que illos mesura minus que un decimo de diametro, le fibras non
pote competer con le connexiones metallic in le quales ambula le electrons,
que es centos de vices minor que isto.

Strangulation fatal

Con isto, le resultato es frustrante perque, si le fibras se comporta multo
ben portante datos de un latere a altere del mundo, illos non pote apportar
los a intra un apparato. In entrar in un computator, le informationes debe
esser convertite al linguage del electrons, creante un puncto de
strangulation que consume tempore e retarda le communication. Con le nove
crystallo, toto cambia. In illo, le photons se hasta in canalettos tanto
micre quanto le cablos del circuitos actual. Que, de ora avante, non essera
plus solmente electronic. Illos essera photonic tamben.

LE CAMMINO VERSO LE FUTURO DEVENI PLUS PROXIME

Le crystallos de silicium montate iste anno non va comenciar a functionar
immediatemente. Le causa es le typo de photons que illos conduce. Isto
mesme: non existe solmente un classe de particulas relucente. Le plus
importantes pro nos es los del luce visibile, le uniches que le oculo human
pote captar. Le fibras optic, del altere latere, canaliza un categoria de
scintillationes appellate infrarubie. E le fragmentos brillante que curre
in le crystallos del MIT recipe le nomine de microundas ? illos es le
mesmes que caleface le alimento in le furno de tu casa.

Passo initial

Pro profitar del informationes transmittite per le fibras optic, le ideal
esserea construer crystallos que, in vice de photons de microundas,
conducerea photons de infrarubie. "Iste va esser le prime passo in le
perfectionamento del crystallo photonic", dice le physico brasilian
Anderson Gomes, del Universitate Federal de Pernambuco. De alora avante, il
essera necessari sculper canalettos sempre plus affinate pro controlar tote
le movimentos del particulas. "On non pote previder quanto tempore isto va
prender", dice Villeneuve. Le prevision, usque le initio de 1998, era de un
o duo decennios. Mais, al rhythmo in que le cosas va, lo plus probabile es
que, imitante le curvas del luce, le Scientia prende un via directissime e
accurta considerabilemente le cammino verso le futuro.

---
PRO SAPER PLUS:
- Gruppo de Photonica del MIT: http://ab-initio.mit.edu
- "The New Physics", Paul Davies (coordinator), Cambridge University Press,
Cambridge, 1989.

---
Traducite de Revista SUPERINTERESSANTE, Brasil, decembre de 1998.
Ensjo.