Ben que io es de accordo que multe religiones, specificamente
religiones del fundamentalistas de tote major fides, es basate super
superstition, io non es preste a dimitter tote religion como un
fallite activitate de humanitate.  Mi conception de religion pote
comprehender communismo, militante humanismo, fascismo insimul con
le baptistas, le shi'ites, le sunni, le hindu, jain, buddhista e
zen, etc.. Tote istos representa human preoccupation con le
significantia de vita, que il existe alque e non nihil, e le
question, que debe un persona facer pro viver un bon vita, e proque?

E io crede que quando personas confunde un cosa finite, sia un
idolo, un causa, un libro 'sacre', un scopo personal como le moneta,
poter, fama e reputation o admiration public, como si illo es le
objecto de su interesse e preoccupation ultime, como si illo es un
objecto sacre in su vita, alora ille es, in le phrases de theologos,
idolatrose.  Ille ha confudite un aspecto de realitate con le
fundation de realitate, que il ha un realitate e non nihil.  Nihil
de iste cosas finite pote ultimemente esser le objecto de su
preoccupation ultime.  Mais cata cosa finite pote esser le foco de
su preoccupation ultime. Cata cosa finite representa que alque
existe in loco de nihil. Illo pote representar un aspecto de iste
preoccupation ultime.  Le amor, symbolos del amor, un Jesus qui
mori super le cruce pro salvar humanitate, un deo qui se sacrifica
que tu pote viver e esser salvate, un acto beneficente representa
que le realitate, tu, es bon, es sustenite e asserite contra nihilo
e morte.  Illo es le esser contra non-esser,le vita contra morte, le
amor contra odio. Istos es aspectos de realitate que monstra que realitate
es sustenite contra oblivion e nullitate. Le nascentia de un catton,
un baby, monstra que vita continua, malgrado morte, generation post
generation, era post era.  Le idolatria es quando on confunde le
objecto que es le foco de tu preoccupation ultime con le ultime
mesme.  E on sape que illo es un idolo si tu debe sacrificar te
e le unes que tu ama tal que illo pote exister.  Un deo que se
sacrifica pro tu es un symbolo ultra que il non ha un ultra que
tu vita, tu existentia, tu esser es amate, es bon, es asserite
contra morte e tote inflictiones.  Symbolos de Matre Natura ha
un similar effecto, proque illo es le matre que assere le vita
de su infante e qui va sacrificar se pro su infante, que revela a
nos que vita, que existentia es bon e sustenite per le poter a esser.

Theologicamente o philosophicamente,
Stan Mulaik