d[981227] x[Allan Kiviaho]
s[Vulpu Negru]

Salute!

Iste natal era interessante pro nostre familia. Ante
vigilia de Natal nos guidava a duo cemeterios, lo de mi
matre e lo del patres, un fratre e un soror de mi marita
Brita-Lisa, insimul ca. 100 kilometros. Il ha in Finlandia
le tradition, que al vigilia de Natal omne tumbas,
specialmente le tumbas de heroes de guerra (illos etiam
in le nocte ante le anniversario del libertate, le Decembro
06), son fornite con candelas e lanternas.

Le vigilia de Natal nos passava con nostre filia e su
quasimarito. Al die Natal nos guidava a nostre cabana de
fin de septimana in le foreste. Despecto le grado de alarma
"rubie" le stratas principal non era tal periculose sed
le ultime 20 kilometros era multo difficile. Nostre cabana
era multissimo delectabile proque nostre filio Jani e su
quasimarita Riikka habeva arrivate jam al previe vespere.
Illes era pro skiar a Teijo, un colle de skiar 20-30 kilo-
metros ab nostre cabana. Jani es un ver maestro con
Telemark, un stilo norvegian. Ille ha fortiate etiam Riikka
a skiar Telemark. Riikka cadeva duo vices e prendeva
grattaturas a su facie. Illa diceva que illa se quasi
irasceva ... Riikka ha alicun dies vacante in Finlandia.
Illa habeva al aeroporto de Heathrow (London) duo alarmas
de bombas, como epilogo al salutes natal de Bill Clinton e
Tony Blair a Iraq.

Como in tote casas in Finlandia nos nos baniava in sauna
ante mangiar e biber. Nostre sauna es ca. 30 metros ab
nostre cabana. Le sentiera es multo scarpate e nunc multo
periculose pro le glacie. Il era totalmente tenebrose sed
Jani habeva ignite tres torchas apud le sentiera. Le natura
era multo belle proque il habeva multe niva sed le niva era
multo humide e isto faceva nostre mover ancora plus
difficile.

Postea le sauna nos bibeva vino rubie, "Vulpu Negru" - vino
romanian. Le etiquetta con un vulpo nigre apportava al
nostre mentes le Carpathos. E nos audiva durante duo dies
solmente musica ex Radio Romania, Bucuresti, ca. kHz 900.
Alicun stationes radio de Romania son ben audibile in
Finlandia.

Io pensa que Romania es le campion mundial del musica
folklore. Radio Romania diffundeva etiam cantos natal
romanian. Tal paises como Polonia, Czechia, Bosnia e
Romania ha lor proprie cantos natal que son multo belle e
non cognoscite in Europa occidental. Un choro de un schola
romanian cantava cantos natal de varie nationes,
includente svedese "Hej tomtegubbar slå i glaset, låt oss
lustiga vara!" sed nulle cantos finnese. Delectabilemente
le Radio Romania non diffundeva le pejor "tingel-tangel"
cantos del natal commercial de occidente. Le Radio Romania
etiam diffundeva un potpourri del cantos natal del
Angleterra e Europa Central, duo de illos in anglese.

Attendente le sequente Natal

Allan