Josu e omnes,
Intertanto io ha essite in contacto telephonic con uno plus vetule e
sage que io, e il me sembla ora que io ha reagite de modo excessive.
Mi excusas pro isto a tote le membros. Io mantene totevia que il non
attestava multe "education" usar le nomine de iste gruppo pro un
nove. Josu, io es felice de vider que tu ha cambiate le nomine de tu
nove gruppo, e io te regratia pro iste consideration.
Io volerea explicar pro tote le membros le rationamento detra le duo
grande limitationes de iste lista de correspondentia, le quales lo
rende antiquate in le perception de alcunos:
(1) Typos de litteras:
Al momento, iste lista permitte solmente le "texto pur" e elimina
tote le typographia del messages ante de diffunder los al membros.
Isto pote parer antiquate, sed ha un grande avantage: le recipientes
ha controlo total super como facer monstrar le messages in lor
schermos individual. In le "preferentias" o "configurationes" de
vostre programmas de e-mail, cata uno de vos membros pote configurar
le typo de litteras, stilo, e grandor in le qual le messages se
monstra, a fin que illos sia maximalmente facile a leger a cata uno
de vos, individualmente.
Es possibile que io cambia iste configuration, e permitte que le
autores defini le typo, stilo e grandor del litteras de lor messages.
Isto resultarea in que le messages non ha plus un aspecto uniforme.
Le autor de cata message, non le recipientes individual, haberea le
controlo super le aspecto del message.
Personalmente io vide le decoration de textos como un distraction
superflue. Io pensa que on communica plus effectivemente habente
solmente le letteras inter A e Z (inclusive) e le interpunction a su
disposition. Isto incoragia uno a pensar del *contento* del message,
non al presentation de illo. (E il es possibile indicar le emphase
como *isto* o como /isto/ o como _isto_.)
Forsan le majoritate del membros prefere nonobstante le secunde
option, i.e. que nos permitte al autores definir le aspecto
typographic de lor messages? Io es preste a considerar lo.
(2) Attachamentos:
Ante alcun annos io ha impedite le inviar de attachamentos via iste
lista pro duo rationes major:
(a) le attachamentos porta le risco de distribution de viruses computatorial, e
(b) illos pote esser multo grande, supercargante le cassas e-postal
del membros, e causante que le discargar de lor posta sia multo
lente. Isto es specialmente un problema con attachamentos que non es
interessante a tote le membros, e in le practica, le majoritate non
es interessante a totes.
Pro iste rationes, le diffusion de attachamentos via listas de
correspondentia es generalmente considerate como un mal idea. Ma il
ha bon alternativas:
- On pote publicar le file in question in un pagina web, e inviar le
adresse URL al file al lista -- le membros interessate pote
simplemente cliccar pro discargar lo, sin causar problemas al
non-interessatos. (Pro imagines, isto es multo facile con sitos como
photobucket.com.)
- O, on pote annunciar in texto le disponibilitate del attachamento,
e inviar lo via e-mail private al interessatos.
Ulterior pensatas:
Si le membros de iste lista lo vole, io es ben preste a considerar
reactivar le diffusion de messages con typos e stilos de litteras. Io
es specialmente interessate in le opiniones del membros qui usque ora
ha essite silente. Que pensa vos? Scribe me privatemente a
[log in to unmask] con un "si" o un "no" quanto al permitter del typos
de litteras.
Le rationes contra permitter le attachamentos me pare plus forte,
proque illos pote causar real incommoditate e mesmo damnos al membros
del lista. Ma io poterea facer un "situla de files" in-linea, un
pagina web, possibilemente protegite con un contrasigno, ubi membros
del lista pote cargar lor files e le alteres pote discargar los. Que
pensa vos de iste idea?
Io spera que iste message sia un initio de un processo que conducera
al fin a un decision que non es unilateral, sed ha le supporto de
nostre communitate.
Alora, discute! :-)
Cordialmente,
- Martijn
--
Archivos e disabonar: http://listserv.icors.org/archives/INTERLNG.html
|
