Car amicos de tote le mundo!

        Al vice io vole scriber alique al membros de iste lista ma non sape si le subjecto es adequate o conveniente. On potera dicer me que le forum "ad hoc" es un altere, que aqui on debe tractar cosas diverse -- novas, politica international, technologia, etc. 
        Io non es un experte linguista apte a debatter in le forums specialisate questiones re le uso e le normatisation de Interlingua. Plus tosto me placerea poter usar iste forum ipse pro excambiar experientias de studio, commentar discopertas interessante in le prodigiose interrete, conversar con altere novicios (io a pena comencia utilisar iste lingua auxiliar international) super le difficultates a maestrar Interlingua autodidacticamente... Io recognosce le valor del gruppos ubi io poterea participar forsan plus liberemente, ma io considera *Interlng* troppo importante e io opina que isto poterea esser le loco plus visitate per tote le interlinguistas o studentes de ia in general, le placia central de nostre conversationes in e re interlingua. Si le movimento intra *Interlng* esseva multo intense io poterea comprender le necessitate restringer le ambito del subjectos aqui tractate, ma isto certo no es le caso, al contrario, al minus recentemente io constata certe inactivitate. Assi, perque non ampliar le scopo de iste forum?
        Pro non prolongar excessivemente iste message, io va lassar pro le futur alicun commentarios super le rolo que le Internet ha jocato in mi studios re Interlingua, si isto me essera permittite.

Amical salutes.

Carlos Alberto Santos
Aracaju - Brasil

--
Archivos e disabonar: http://listserv.icors.org/archives/INTERLNG.html