[post 'sisypho', ecce un extracto inedite ab 'le sentieros impervie del
ariano theodisko in interlandia']
*
io habita in le campania. quando il face bon tempore il me place vagar in
le campos e pratos, ubi on pote leger alcun fructos biologic e colliger
fungos saporose, ultra inspirar le pur aere autumnal

un de iste dies io prendeva mi can e iva facer un promenada. qualque
kilometros longe de nostre puncto de partita, io videva un parve grege de
oves que pasceva, tranquillemente, le tenere herba ancora humectate per le
guttas del rore matinal. ma quando nos nos approximava un poco plus, io non
sape pro qual ration - pois que nos camminava trans un pineto e lassava,
durante alcun tempore, de vider le grege -, io notava que il habeva
occurrite alco que rendeva le grege partite in duo gruppos: un del gruppos
consisteva solmente de un vetule e corpulente ariete, e, le altere, esseva
constituite per le resto del grege

durante que sultan se amusava per currer alacremente super le tracias de
chassa ancora fresc, e pissava hic e illac post flairar petras, plantas e
excrementos de altere animales, io me sedeva sur un grande rocca observante
le grege partite e prendeva alcun notas del comportamento de su elementos,
le quales io ora transcribe hic.

**
il ha duo typos de arietes: le ariete 'normal', docile, benigne e cordial,
e le ariete 'anormal', con un temperamento rude e obstinate. ambes cohabita
in le grege, ma le 'anormal', pedante e con le ego inflate, vole ser le
leader del 'truppa(s)' e face toto pro traher le attention del pastor e de
su companiones. le altere, al contrario, mena un vita sin preoccupationes,
in harmonia con le grege

le character del prime de illos esseva le metaphora pro le 'agno de deo',
durante que le temperamento del secunde, inflexibile, martian e bellicose,
con un capite dur e un obstination sin limites, serviva como metaphora pro
le utensile que le guerreros ancian e medieval usava pro assalir castellos
e fortalessas per cornar, intempestive- e cecamente, contra le portas
ferree que defendeva le edificios ubi se protegeva le populationes menaciate

le prime, combattive, si, ma con bon senso, aperte e congenial es le ariete
typic que vive pacificamente con/in le grege; le secunde, autoritari e
militaresc, mena un vita de incessante lucta interior (contra su ignorantia
e frustration), lo que es reflectite in le permanente battalia que ille
face contra le alteres pro attinger le poter, i.e., le autoritate perdite
***
'sisypho': http://babel-ia.blogspot.com.br/p/sisypho.html?m=1

--
_________________
www.interlingua.com


--
Pro leger le archivos e pro modificar o cancellar le subscription:
http://listserv.icors.org/archives/interlng.html