Con respecto al orthographia, isto es un cosa de personal preferentia.
Le argumento que le "ortografia simplificate" es "plus progressive e
rational" es pur rhetorico.  Il depende super qual es vostre rationes
si o non il es "rational".  Un valor pro me, in apprender e usar le
interlingua, es que mi cognoscimento del formas prototypic accresce mi
comprehension del anglese.  Io rememora un curso in le universitate
pro crescer le vocabulario (in anglese), e nos studiava le radices e
affixos del latino e le grec in anglese.  Libros como "30 dies a un
plus grande vocabulario" ha semper essite popular in le Statos Unite.
Istos insenia le radices latin e grec e lor significationes in anglese.
Le orthographia "prototypic" in interlingua conserva le formas del
parolas grec in le vocabulario international, que es le mesme essential-
mente como in le anglese. Le orthographia de espaniol, ha semper parite
alquanto opac a me quando io probava a comprehender le significantia de
parolas espaniol. Potesser le forma visual es plus importante a me in
recognoscer un parola.  Io non dice que isto es un ration tote le mundo
debe acceptar. Mais io opina que on reduce le attraction de interlingua
al angloparlantes como un vehiculo al crescite comprehension de lor
proprie lingua quando on scribe interlingua in un "ortografia simplificate".
E le mesme pro mesmo le espanioles, que vole crescer lor comprehension
de non solmente lor proprie lingua, mais linguas sororal.

E il ha necun commission in interlingua que va decider in favor de un o le
altere orthographia.  Ambe systemas es permittite, e isto del comenciamento
de interlingua.

Sia tolerante de diversitate!

Amicalmente,

Stan Mulaik