Nostre computatores nunc es plus intelligente que nos
in un varietate de dominios intelligente le quales
usque nunc ha essite multo restringite.  Illos pote
jocar a chacos melio que nos.  Illos pote facer unes
tipos de diagnoses medic plus rapide- e efficacemente
que multe medicos.  E illos anque pote facer unes
cosas que nos non pote, como guidar missiles
rapidemente.

Usque nunc illos non ha potite describer objectos
commun que on ha ponite sur un tabula, scriber
summarios de libros o films, o distinguer inter un can
e un catto.

Un explication pro iste disparitate de capacitates es
que mesmo nostre computatores le plus advantiate es
multo plus simple que un cerebro human.  Ma durante
iste seculo il devenira progressivemente plus
difficile distinguer inter le intelligentia artificial
e human, e probabilemente in unes vinti annos nostre
computatores habera un intelligentia comparabile al
cerebro human.

Le prime machinas con iste grado de intelligentia
probabilemente non habera le flexibilitate del
intelligentia human proque lor logiciel essera assatis
limitate.  Il ha diverse manieras de construer tal
logiciel.  Un maniera es emular le cerebro human post
discoperir como illo functiona scannante lo con
systemas non-invasive a base de resonantia magnetic e
le emission de positrones.

Le prime picturas del cerebro human usante iste
technologia non habera un foco multo precise.  Ma
gradualmente iste imagines devenira plus clar, e nos
potera observar le circuitos del cerebro con un
nivello de detalio que nos petmittera reproducer los
electronicamente.

Iste processo nos permittera evoluer systemas de
computation neuronal parallel, le quales nos potera
combinar con systemas designate specificamente pro
comprender le linguage e pro leger e comprender
documentos scribite.

Ben que le capacitate de nostre computatores pro
processar le linguage natural es multo limitate, lor
capacitates nunc evolue multo rapidemente.  E
probabilemente unes pauc annos post 2020 nostre
computatores potera leger omne nostre libros,
magazines, e jornales scientific.

Eventualmente nostre machinas potera facer lor proprie
investigationes e accumular lor proprie cognoscimentos
ex omne nostre medios de communication e servicios de
information, communicante lor cognoscimentos le unes
con le alteres de manieras vermente comprehensive.

A iste stadio nostre computatores devenira multo plus
intelligente que nos.  Mesmo le prime computatores
electronic construite inter 1940 e 1950 facilemente
poteva apprender de memoria milliones de numeros de
telephonos, durante que nos ha difficultate apprender
solmente 10 o 20 de illos.

Un computator pote cercar un archivo con milliardos de
documentos in parve fractiones de un secundo, e illos
facilemente pote combinar lor archivos de multe
manieras.

Nostre neurones es creationes maraviliose.  Ma nos
potera portar lor capacitates a machinas de manieras
multo plus efficace.  Multo ex le complexitate de
nostre neurones se dedica a mantener lor viabilitate
biologic.  Illos anque es lentissime.

Le combination de intelligentia al nivello human con
le grandissime memorias de computatores que travalia
milliones de vices plus rapidemente que nostre
systemas neuronal, naturalmente, essera formidabile.

(Adaptate ex "The Age of Spiritual Machines:  When
Computers Exceed Human Intelligence", New York,
Viking, c1999, pp. 3-4.)

__________________________________________________
Do you Yahoo!?
Yahoo! Tax Center - forms, calculators, tips, more
http://taxes.yahoo.com/