Del jornal "Folha de São Paulo" (04/11/2003)
http://www1.folha.uol.com.br/fsp/mundo/ft0411200302.htm
SUA NON VA "FUGIR" DE IRAQ, DICE BUSH
Un die post le attacco plus letal al fortias american in Iraq in le
post-guerra, le presidente George W. Bush diceva heri que le SUA "non va
fugir" del pais e que le americanos "non va reposar" durante que le
"periculos" que Iraq ancora representa "al civilization non es totalmente
removite".
"Nostre inimicos in Iraq pensa que nos va fugir. Es pro isto que illes
occide personas innocente e attacca le truppas del coalition. Nos nunquam
va fugir", diceva le presidente.
Le commentarios de Bush esseva le prime post que un helicoptero american
esseva abattite in Iraq, ante-heri, occidente 16 soldatos e vulnerante 20
-- illo esseva le major numero de perditas american in un sol die in Iraq
in le post-guerra.
Malgrado le determination de Bush, es crescente le criticas contra le
strategia del SUA. Le censura recurrente es que le SUA es excessivemente
lente in preparar fortias de securitate iraqian pro promover le transition.
Analystas appuncta le participation de personas loyal al ex-dictator Saddam
Hussein e de combattentes estranier in le attaccos.
"Mais le iraqianos commun se fatiga del occupation, del insecuritate, e del
manco de servicios basic", scribeva Sandy Berger, assessor pro Securitate
National in le governamento Bill Clinton (1993-2001), in un articulo pauc
dies retro. "Militares american e britannic ha allertate al risco que le
opposition suffre un metastase e Iraq passa per un revolta popular."
Pro Anthony Cordesman, analysta del Centro International de Studios
Strategic, assi como le truppas american, le iraqianos commun deveni sempre
plus "sensibile" a riscos in Iraq.
Susan Rice, membro del Consilio de Securitate National durante le
governamento Clinton, considera vital, ultra le securitate, le
acceleration, per le SUA, del transition politic in Iraq, con un
participation major del factiones politic del pais in le decisiones.
"Sub le plano american, le iraqianos non debe facer multo, salvo restar
sedite vidente le fortias de occupation e interprisas american decider como
reconstruer lor pais", dice Rice.
Durante le weekend, tamben se levava dubitas super le precision del
informationes relative al numero de nove policieros in Iraq trainate e
pagate per le SUA.
In interview in le TV, le secretario del Defensa, Ronald Rumsfeld,
affirmava que le numero de policieros ja superpassava 100 mille.
Vinti dies ante, le administrator american de Iraq, Paul Bremer, habeva
declarate esser 60 mille le nove policieros. In le jovedi passate, le
assessor pro le Securitate National, Condoleezza Rice, diceva que illes
esseva 85 mille.
Mesmo in le media nordamerican, normalmente tolerante verso Bush, le serie
de attaccos recente in Iraq ha accentuate le tono del criticas e le
apprehension in relation al futuro del pais.
Iste septimana, pro le prime vice le magazin britannic "The Economist"
recognosceva le difficultates in Iraq. In editorial, le publication
affirma: "Le fiasco [in Iraq] comencia a parer possibile".
CASSAS FUNERARI AMERICAN
Le militares american reiterava heri le prohibition del registration de
imagines del cassas de soldatos morte, in vigor desde 1991, negante que
illo sia censura.
"Il ha duo modos de confrontar isto: alcun americanos dice que le publico
debe vider lo [le cassas funerari], mais tamben nos pote pensar al parentes
del mortos e lor trauma de vider in le TV le imagine del filio essente
repatriate", diceva un functionario del Pentagono.
|
