CANCERE KILLER
Specie invasor menacia crustaceos brasilian

Le concurrentia estranier es mesmo dur de confrontar. Que se vide le
exemplo del interprenditores national e del canceres. Sex species native es
menaciate per cosinos verdesc e magrette, le canceres _Charybdis hellerii_,
original del regiones calide del Mar Mediterranee e del Oceano Pacific. Le
monstrettos, secundo imagina le recercatores, ha arrivate al costa del pais
de maniera clandestin, probabilemente intra cisternas de navios
petrolifere. Tal compartimentos es inundate con aqua marin al loco del
imbarcamento, pro dar stabilitate al imbarcation durante le viage, e
evacuate proximo al portos de destino. Jectate in aquas brasilian insimul
con aquelle carga, le alienigenas pare haber trovate le paradiso perdite.
Illos compete voracemente pro alimento con le species que ha existeva aqui
e, perque illos non habe predatores, illos se reproduce a un velocitate
stupende.

Si illos esseva appetitive, le invasores poterea trovar in le homine un
inimico ferocissime. Lor carne, nonobstante, non plena un coclear de the e
illos habe un gusto multo mal. Sin valor commercial, illos es dispreciate
per le mesme piscatores qui non da reposo al canceres del fauna local,
optime pro appetitivos e plattos. Le _Charybdis hellerii_ ha essite trovate
le prime vice in Brasil in 1995, in le Insula del Fontes, a Salvador, per
le biologos Edilson Pires de Gouvêa e César Roberto Carqueija, del
Universitate Federal de Bahia. Mais illos ja ha essite vidite a Rio de
Janeiro e a São Sebastião, in le litore de São Paulo.

"Il es ancora troppo tosto pro parlar de extinction de species, mais certo
le canceres estranier va continuar disseminante se e prejudicante lor
concurrentes national", previde Gouvêa. Il es le globalization in version
crustacee.
---
Traducite de Revista VEJA, 20 de decembre de 1998.
Ensjo.