On 10/27/06, piet cleij <[log in to unmask]> wrote:
> Le principio de wikipedia es que cata uno pote inviar su articulos
> non censurate. A prime vista isto pare un belle principio, que tamen
> ha su consequentias multo negative, nam iste liberalismo aperi
> largemente le porta a textos de qualitate inferior. Un exemplo es
> le articulo "AMSTERDAM", scribite in un sorta de interlingua
> vermente horribile. Naturalmente alteres ha le possibilitate de
> corriger tal prosa execrabile. Ma esque iste alteres ha le tempore
> e/o le energia e/o le interesse de jocar le rolo de un maestro de
> schola?
> Tamen, si tal textos in un interlingua non corrigite continua a exister
> in wikipedia, il es certe que illos va haber un effecto destructive al
> promotion de interlingua.

Io es totalmente de accordo que le textos de qualitate inferior es
detrimental al promotion de interlingua; equalmente io comprende que
non tote le mundo vole jocar a maestro de schola.

Ma il ha alco simple que tu pote facer pro limitar le damno: quando tu
discoperi un articulo de qualitate linguistic inferior, clicca
"Modifica" e insere le signo "{{Revision}}" ante le texto. Per
exemplo:

{{Revision}}
blablabla (resto del articulo)

Isto face inserer un advertimento al publico que le texto es de
qualitate linguistic inferior e necessita revision. Forsan plus
importantemente, illo automaticamente adde le pagina a un categoria de
paginas requirente revision linguistic:

http://ia.wikipedia.org/wiki/Categoria:Articulos_pro_revider

Quandocunque io ha le tempore e le inclination, io corrige un pagina
ex iste categoria e elimina postea le etiquetta de isto.

Si, il es penose jocar al maestro de schola... ma al altere latere,
mesmo le articulos in mal interlingua ha valor, proque illos porta
cognoscentia e information; illos debe solmente esser linguisticamente
meliorate, un labor multo minus grande que scriber le articulo ab
nihil. Io pensa que le causa de interlingua vale un poco de jocar al
maestro de schola.

Io volerea exhortar ancora un vice tote le interlinguistas capabile de
examinar periodicamente iste pagina de articulos requirente revision,
revider un de illos e eliminar le etiquetta {{Revision}}, a fin que
iste pagina se diminuera de plus in plus e le qualitate linguistic de
Wikipedia in Interlingua deveni de plus in plus bon.

- Martijn

--
Archivos e disabonar: http://listserv.icors.org/archives/INTERLNG.html