Quando io era un puero io visitava de vice in quando un dentiste, qui
habeva le habito de confabular incessante durante que ille travaliava.
Naturalmente, con su patientes quasi semper mute a causa de multo coton e
instrumentos in lor buccas, le vetule dentiste non habeva concurrentia.

Io nunquam oblidara iste parve historia, un experientia del filio del
dentiste durante su tempore como soldato american in le guerra contra
Germania.  Le facto que le dentiste e su familia era judee face le historia
un pauco plus emotiante, io pensa.  Durante le hiberno de 1944 le germanes
lanceava lor ultime grande contraattacco contra le armeas alliate
avanciante verso Germania ex le west.  Post batallias acerbe le attacco
german falleva.  Grande numeros de soldatos german era captivate.
Le filio de mi dentiste recipeva le ordine a escortar un grande gruppo de
prisioneros german al posterior del linea de combatto.  Le germanes era
naturalmente disarmate ma le juvene filio de dentiste portava su
mitraliatrice parate a tirar.  Como jam dicite, il era hiberno e le via era
coperite de nive e glacie.  Durante le marcha, quando le gruppo era in un
loco isolate, le american, sin advertimento, poneva le pede sur un loco
glaciate e multo lubric. Ille perdeva catastrophicamente su equilibrio e
cadeva pesantemente per terra.  E, pessimemente, ille perdeva le
mitraliatrice.  Isto derapava se preter le via verso le germanes.  Le
american tentava rapidemente levar se pro recuperar le arma, ma troppo
tarde.  Un soldato german saltava ex le fila de prisioneros e hastava se
verso le mitraliatrice jacente sur le nive.  Nostre filio de dentiste
videva subito su vita passar avante su oculos.  Le german sublevava le arma
e reguardava le american ancora sur le genus in le nive.  Alora, le germano
surrideva.  Ille ambulava verso le american, dava lo le arma, e retornava a
su loco in le fila.