Le 29 de julio al 3 de augusto 2014 va occurrer le Incontro (Nordic e)
International de Interlingua in Åsa, presso a Gothemburgo, Svedia.

Lege plus hic e nota que on pote haber un reduction del precio si on paga
ante le 5 de maio:

http://www.interlingua.com/official/2014-03-12-conferentia

Le programma final non ancora es toto preste, sed va consister de un
mixtura de activitates recreative e "labor" creative con un serie de
differente "workshops". *) Anque alicun discursos interessante serea
desirabile, e pro isto nos jam nunc face un appello pro voluntarios qui
volerea practicar lor habilitate oratori durante un sojorno agradabile.

Infortunatemente, nos non pote offerer ulle honorario, e on ancora debe
pagar le precio pro le participation. :-)

Interessatos pote contactar le gruppo de programma hic, o per scriber al
adresse info (coclea) interlingua (puncto) dk .

Si on ha ideas pro workshops o altere activitates, o commentos in general,
nos anque volerea audir los!

Infra seque alcun parolas de Thomas Breinstrup pro vostre inspiration.

*Car omnes.*

*Nos cerca personas qui vole facer un presentation durante le incontro
nordic/conferentia international in Åsa iste estate.*

*Nos desira facer un programma variate e interessante, e pro isto nos spera
que il ha alcuno(s) inter vos, qui es preste a facer un interessante
presentation de 30-40 minutas super un thema que vos interessa - e que pote
interessar omne nos alteres.*

*Nos amarea multo audir super:*


   - *un interessante viage a un pais distante o proxime, un insula
   deserte, un urbe fascinante, un tour in ballon supra le savanna african
   o... - *


   - *un narration super tu profession - experientias como veterinario,
   professor, medico, jornalista, director de theatro, ingeniero, chimico,
   politico etc., con anecdotas (plus o minus ver - nemo pote controlar lo!)
   etc.*


   - *un hobby que te interessa: forsan tu es experto del Guerra de 30
   Annos, de ballones aerostatic, de pisca de balenas, de musica dodecaphonic,
   de cocer potteria o qualcosa altere.*

*Per favor, adjuta nos e pone tu sapientia a disposition pro crear un
successose arrangiamento, que inricchi omne participantes. Al mesme tempore
isto es un bon exercitio de usar interlingua, nam le presentation debe
naturalmente esser in interlingua assi que omnes pote comprender lo. Ma
certo il ha personas qui pote assister te, si tu desira assistentia con
parolas e expressiones - non hesita demandar!*

*Si possibile, le presentation debe esser accompaniate per photos, proque
isto adjuta multo quando on ascolta in un altere lingua. Isto da plus de
vita al presentation e significa que on memora melio le contento.*


*) Naturalmente on non es fortiate a participar in le activitates, sed pote
seliger los que on trova interessante e passar le resto del tempore
relaxante.

-- 

http://www.interforo.org - foros in interlingua
*** Ask not what you can do for your conlang - ask what your conlang can do
for you ***


--
Pro leger le archivos e pro modificar o cancellar le subscription:
http://listserv.icors.org/archives/interlng.html