Le sequente nullemente es un contribution al presente debatto, ma in connexion con iste debatto io ha relegite partes de mi correspondentia con Alexander Gode, qui sempre me ha fascinate como persona e personalitate. Le ultime littera ab ille se data de circa un mense ante su morte. (A ille tempore io esseva ingagiate in un reorganisation del UMI, supportate per Gode.) Io lo distribueva a plure interlinguistas, e nunc me veniva le idea de reproducer lo in iste foro - sin ulle commentos o conclusiones. Forsan de un certe valor historic.
    - Bent

"le 4 de julio, 1970

Car Andersen:

Brevemente alicun parolas de appreciation e de gratitude.

Como vos lo sape, io perde nulle occasion pro asseverar que ni io ni ulle altero es le "fabricator" de Interlingua, sed isto non significa que io non es sufficientemente arrogante pro reguardar Interlingua como le obra de mi vita. Isto non es paradoxe: Sin mi effortios, Interlingua -- ben que latentemente real -- non esserea palpabilemente real. Quando io insiste que Interlingua non esseva fabricate per me o ulle altere individuo, io lo face non per un excesso de modestia sed exclusivemente pro accentuar le origine nonartificial de Interlingua.

Per omne isto io vole suggerer que mi attitude verso Interlingua -- in despecto de omne lo que io ha scribite e dicite in un senso apparentemente contrari -- es le attitude de un patre verso su filio. Le metaphora es ben seligite. Per medio de illo io pote exprimer que Interlingua ha attingite su majorennitate, i.e. que io debe cessar supponer que un decreto con mi signatura pote cambiar Interlingua. Sed mi motivos in sublevar iste thema es satis plus complexe: Ben que io abhorre omne forma de dogmatismo, io non poterea vider sin profunde regrettos que le homines qui me seque in importante positiones intra le movimento pro Interlingua tende a cambiar le ultime bases metalinguistic del systema disveloppate sub mi direction. Sed, fortunatemente, quasi omne le prominente personalitates in le movimento pro Interlingua ha plenmente comprendite le ultime incambiabile principios historic, philosophic, organic per medio del quales Interlingua ha essite derivate. Isto me rende felice e pro isto io es grate.

Comenciante con Monsignor Schleyer io crede vider que le varie projectos de lingua universal incontrava major difficultates in le transition ab le prime al secunde generation, frequentemente in consequentia del manco de flexibilitate in le fundator del movimento o in consequentia de un forte tendentia herolatric del parte del prime protagonistas. In Interlingua io detege pauco o nihil de un tal disveloppamento. Io non es satis modeste pro non arrogar a me un grande parte del merito pro le facto que Interlingua attrahe primarimente individuos qui comprende que lo que vive non pote esser rigidemente schematisate e que in certes de su aspectos Interlingua va semper remaner un vision, i.e., un structura ben solide in su grande lineas sed continuemente vive e variabile.

Si in recente annos le puncto de gravitate in le activitates pro Interlingua se ha transferite ab America ad le ancian continente, isto non significa que le spirito in le qual nostre movimento es dirigite ha essite cambiate. In transferer le functiones del leaders a vos e vostre socios io ha le certitude que le nove leaders es non solmente personal amicos mie sed etiam representantes del typo de pensar que io ha representate durante multe annos.

Vos comprende que iste stato del cosas es pro me un fonte de grande satisfaction.

Cordialmente,

Alexander Gode

AG/al"

--
Jeg beskyttes af den gratis SPAMfighter til privatbrugere.
Den har indtil videre sparet mig for at få 88 spam-mails.
Betalende brugere får ikke denne besked i deres e-mails.
Hent gratis SPAMfighter her: http://www.spamfighter.com/lda

--
Archivos e disabonar: http://listserv.icors.org/archives/INTERLNG.html