Car amico Antonio Castro Lorenzo,
>>Es que vos nunc non crede in Interlingua?.<<
Primo: vole ben tutear me. Malgrado mi 75 annos de etate, il me placerea multo que tu me tractava per "tu", non per "vos".
Secundo: Io continua a creder in interlingua, como LIA (lingua international auxiliar), mais io ha habite alicun deceptiones / disillusiones.
Pro exemplo: tu surgeva in nostre universo como un extraordinari promissa, como alicuno qui, con tu brillante intelligentia e tu cognoscimentos de marketing, poterea adjutar nos in un momento crucial, in que le stagnation del UMI faceva (face) nos timer le morte irremediabile de interlingua. Regrettabilemente, totevia, tu non voleva del toto collaborar con "Romanica", e tu ha decidite "disparer".
Desde alora, io ha reducite mi actuation pro "Romanica" e me habe associate ad un altere idealista del causa del lingua international: Osmund Knutson Aukland. Nostre commun frustrationes ha nos ducite a "designar" un nove version de interlingua, que forsan pote esser accepte in un plano plus international o mundial, e iste version nos ha denominate "latinove".
Naturalmente, isto es considerate per interlinguistas como alte traition, mais io e Osmundo non pensa assi. Nos crede que mesmo nostre modeste effortio parallel o collateral pote contribuer al superviventia de interlingua, del mesme maniera que io ha sempre essite del opinion que "Romanica" non es inimica de interlingua, mais que poterea (e pote) unir se a interlingua in un tentativa de facer reviver le movimento pro le lingua international.
Io ha demandate exclusion del foro "actioninterlingua" pro "suggestion" de Jan Årmann. Alteremente, io (e Osmundo) esserea expulse de ille foro, que io appella "secrete" perque illo de facto lo es, pois il non se tracta de un foro aperte, ubi multe gente pote discuter subjectes concernente le destinos de interlingua. Solmente tres o quatro personas ha essite selegite pro isto.
Finalmente, io me congratula con le interlinguistas pro tu nove disposition de collaborar con le "movimento". E io vos desira sinceremente plen successo.
Cordialmente,
Carlos Alberto
--
Archivos e disabonar: http://listserv.icors.org/archives/INTERLNG.html
|
