In 26 dies fini le possibilitate de inscriber se pro le 17-me conferentia 
international de interlingua in Svedia iste estate. Experientia un 
septimana unic, ubi tu in compania international vive septe dies e noctes 
con interlingua.

Le conferentia habera loco le 16-22 de julio in Åsa, al sud de Göteborg, 
vicin al impressionante costa roccose svedese. Le conferentia celebra le 
50-esime anniversario del fundation del Union Mundial pro Interlingua sub 
le motto: "Interlingua - 50 annos con communication sin frontieras".

Inspiration, intertenimento, practica, discussiones, labor, natura, 
cultura e excursiones es sempre partes de un conferentia de interlingua, e 
tote le familia es invitate. Le centro conferential, situate a 75 metros 
del mar, es moderne e ha un vista meraviliose al natura. Le standard es 
alte, le mangiar excellente, e le precios es attractive.

Le excursiones comprehende un die in Göteborg con guida, con visitas 
cultural e con possibilitate de facer compras. Altere excursiones vadera 
al impressionante zona natural Getterön con aves in multitudes, e al 
fortalessa de Varberg ubi le daneses e svedeses ha luctate durante 
seculos.

Le 15 de maio es le ultimissime data de inscriber se - ma invia le scheda 
de inscription si tosto como possibile pro esser secur del camera 
desirate. Nota que tote le precio de participation anque debe esser pagate 
ante le 15 de maio.

Lege multo plus, vide le multe photos, inscribe te, e presenta tu 
propositiones al programma que va esser preste tosto - visita 
http://www.interlingua.com