Un breve reporto de mi pais re le cambio al euro.

Brevissime version: Toto va ben. Il non ha problemas digne de mentionar.
Nulle spectaculo ni scenarios de damnation. (Que enoiose.)

Version minus breve: Le presidente del Banca Nederlandese, Wellink,
expecta que le cambio al euro incontra le minus problemas in Nederland
de tote Europa, e declarava Nederland le probabile "campion europee".
Nulle grande problemas ha essite reportate. Le numero de robamentos ha
essite *minus* grande que le medio pro iste tempore del anno, non plus
grande, como expectate.

In le initio del 1 de januario, il habeva problemas minor in le
functionamento del retes del bancas, assi que alcunos non poteva obtener
billetes immediatemente. Le servicio postal habeva problemas de software
in 200 officios e agentias minor. Actualmente, 80% del automatos de
moneta es cargate con euros, reporta le teletexto.

Hodie esseva le prime die a expender le euro in botecas e supermercatos.
Isto totevia non esseva le plus grande nova del die; le jornales de
television comenciava con le reimplaciamento del direction del Ferrovias
Nederlandese (Nederlandse Spoorwegen, NS) per le ministro de traffico,
proque le trainos son excessivemente retardate e disfunctional. Solmente
pauc tempore esseva usate pro novas super le euro. (E io sperava de
haber multo a reportar! Qual disappunctamento. :-p )

Totevia, io non usara le euros usque a mi retorno a Nederland ab Svedia,
in le medio de januario.

- Martijn

P.S. Contrarimente al credentia popular, 99% del automatos es capabile
de rejectar con successo le famose pecias de 10 baht de Thailand.

P.P.S. Esque alteres vide un parallelo con le "problema del anno 2000"
que equalmente esseva reguardate con panico e scenarios de damnation, e
al fin quasi nihil occurreva?