Pro Tribuna de Europa: PRODI, PRESIDENTE DEL COMMISSION Romano Prodi ja conta con le approbation del Parlamento Europee pro esser le proxime presidente del Commission Europee. Le Camara le ha approbate con majoritate absolute: 392 votos a favor, 72 contra e 41 abstentiones. 77% del eurodeputatos qui ha votate ha date lor approbation. Malgrado le approbation con elevate margine (su antecessor in le carga, Jacques Santer, ha obtenite 260 votos a favor, 238 contra e 23 abstentiones) le eurodeputatos ha insistite que illo non esseva un "carta blanc". Le presidente es sub proba e pro le momento le nomination es usque januario. Correspondera al nove Parlamento extender officialmente le mandato usque a 2005. Le nove presidente assumera functiones probabilemente in septembre, post que le Parlamento se habera pronunciate super le conjuncto del Commission. Es previste que Prodi presentara su propositiones al commissarios le 21 de julio ante le plenario. Le audientias al commissarios haberea loco in le commissiones parlamentari durante le prime septimana de septembre. In su discurso de investitura, Prodi ha advocate pro un ver politica exterior commun e ha signalate que le allargamento verso le Est obligarea a poner Russia in le prime loco del lista de prioritates de ille politica ancora quasi inexistente. Ma supertoto ille ha advocate un strategia pro le Balkanes pois le stabilitate de Europa poterea currer periculo si il non ha pace in ille zona in le proxime menses. Prodi ha recommendate como objectivo transferer al Balkanes le philosophia del Union con vistas verso un eventual adhesion. Liberalization economic Quanto al politica economic, Romano Prodi ha anticipate un reduction del participation del impostos in le PNB e a causa de illo se debera limitar le expensas currente. Quales? Probabilemente, ille ha suggerite, le expensas social. Ille ha defendite le liberalization del mercatos de benes e servicios e le reformas structural in le mercato de travalio. E pro le protection del medio ambiente ille se ha pronunciate partisano de impostos super le agentes contaminante. Areas gris Tote le oratores ha coincidite in le necessitate de reformas interne in le Commission. Super isto Prodi se ha extendite. Ille ha advocate pro un Commission con major capacitate politic e pro un delimitation clar de responsabilitates politic e administrative. On deberea comenciar per poner fin al "areas gris" que difficulta le separation de functiones e le identification de responsabilitates. Le cabinettos deberea esser supranational. Manca plus travalio in equipa, un integration de portafolios e un major coordination del commissarios, ha sublineate Prodi. Non tote le eurodeputatos ha essite satisfacte con su allocution. Illes del Sinistra Unitari o ha votate contra o se ha abstinite a causa del emphase sur le competitivitate e le flexibilitate laboral. --- Correctiones, suggestiones? Ensjo.