UN NOVE DEFINITION DE UN JORNAL QUOTIDIAN
per ALBERTO MANGUEL
autor argentino-canadian laborante in Paris, London e Toronto;
ha publicate 1996 "A History of Reading"

Fonte: Le jornal quotidian svedese Svenska Dagbladet 1998-01-24

Traduction del original a svedese: Urpo Jääaro
Traduction ab svedese a Interlingua: Jan Årmann
Edition: Emerson José Silveira da Costa

A bon hora un matino del anno 59 ante Christo le citatanos de Roma se eveliava vidente que on habeva exponite un placardo al parietes de Forum Romanum. Le placardo habeva le titulo Acta Diurna e contineva le novas del die. In tal maniera il se commenciava.

Plus que duo mille annos plus tarde, con massas de annuncios, opiniones libere, commatrage, contos fictive, que es miscite in le novas, on a vices pote haber difficultate in comprender qual scopo un jornal quotidian debe haber. E pro qui illo es facite? Il es remarcabile que un tal jornal in le era del electronica ancora functiona como un medio de contactar milliones de lectores ma que quasi ubique illo es create con tal basse grado de originalitate e de phantasia.

Ma il ha signales de sperantia. Il a vices eveni que un editor se questiona le scopo del jornal e commencia un reformulation del jornal, non sol le layout e typographia, ma le substantia, lo que es le motivo pro su existentia. In Fortaleza in Ceará in le nordest brasilian le jornal O Povo ("Le Populo") recentemente completava su 70me anniversario. Illo non pertine al gigantes in terminos del numero de lectores. Demócrito Rocha initiava le jornal al 7 de januario de 1928 e hodie illo ha 26000 lectores quotidian. Ma su ingeniosetate es exceptional. Le proprietario presente, Demócrito Dummar, qui es le gran-granfilio del fundator, plure annos retro comenciava pensar a possibilitates de usar le jornal pro altere scopos. Un jornal que es legite per tal numero de lectores poterea offerer altere servicios.

Con supporto del governamento e le Fundation Demócrito Rocha, Dummar initiava un universitate aperte que poteva usar le rete de O Povo.

Hodie cursos es offerite in campos differente como investigation de mercato (marketing), voga, contabilitate e studios in economia. Le lectores pote inscriber se e le costo es un abonamento al jornal. Isto es valide pro tote cursos e le material prescribite pro le studios es inviate con le jornal. Al fin del curso le jornal invia al studentes un proba in forma de selection multiple que le studentes pote solver a casa. Le proba es inviate al universitate aperte in Ceará e le studentes qui ha essite approbate recipe lor certificatos. Plus que 17000 studentes, plus que le medietate del lectores del jornal, ha essite approbate in le campo de investigation de mercato.

Inspirate per su projecto,  O Povo aperiva nove campos a studiar. Pro adjutar studentes in gymnasios a approbar se in le probas pro acquirer un placia in le universitate, le jornal ha cata septimana publicate un compendio pro cata un del dece titulos pertinente al lista de literatura obligatori, anque providite con un proba-se-ipse e literatura recommendate.

Le nordest brasilian ha un tradition cultural folkloric ric e O Povo ha decidite supportar lo. Un del plus ben cognite formas del cultura folkloric es le "literatura de cordel", o literatura in un corda: parve quadernos imprimite que pote continer poemas re evenimentos contemporanee, que es scribite per bardos ambulante e que sovente es illustrate con xylographias folkloric. Le quadernos es pendite a un corda pro vendita al mercatos in le villages. O Povo publicava un serie de articulos re iste forma popular de poemas e fabulas e ha arrangiate un distribution selective de iste obras con le jornal. O Povo distribueva "un corda per septimana" durante dece septimanas. In tal maniera le autores e artistas obteneva honorarios e un plus grande publico. O Povo ha etiam planate pro le futuro inviar con le jornal CDs con musica local e per isto supportar le bandas de musica in le villages.

Un exemplo final del nove intention de O Povo es que le jornal vole incoragiar le disveloppamento del jornalistica in le areas povre per dar al parve jornales del villages accesso a technicas moderne (imprimerias). Le "Jornal de Cariri", que es producite per ambe jornalistas professional e laicos del region, es cata die inviate per Internet a O Povo in Fortaleza ubi illo es imprimite e reinviate a Cariri le mesme die.

Le jornales commun in Europa e America del Nord es fidel al tradition del Acta Diurna. Illos contine novas e commentarios que se expecta que on lege rapidemente in le matino con le caffe o in le vespere in le autobus in le via a casa. Postea le jornal es relinquite.

In le tempore quando le TV e Internet ha prendite le prime position in le chassa de novas e pote offerer un ample selection de commentarios cata hora, il es forsan le momento favorabile pro le jornales sequer le exemplo de O Povo e offerer servicios plus utile a lor lectores ancora fidel.