Secundo le revista _Tech Topics_, del Association de Ex- Alumnos de Georgia Tech (Georgia Tech Alumni Association), James O'Kon, un ex-alumno in le ingenieria civil del classe de 1961, ha discoperite le plus grande ponte in le mundo del antiquitate in le jungla del peninsula de Yucatan in America Central in 1989. Quando visitante le sito del ancian regno del mayanos, ille approchava un antique citate in un canoa super le riviera Usumacinta. Le canoa passava presso un pila de roccas, e ille diceva a ille se: "Ille es le pila de un ponte!" Le citate antique esseva Yaxchilan (se pronunciava como yashilan), un centro de ceremonias que floresceva inter 500 e 700 durante le periodo classic del mayanos. Archeologos ha studiate le sito del citate pro plus que 110 annos, mais le pila de roccas in le riviera ha essite ignorate, o explicate como un parte original del terra que ha essite incirculate per le riviera cambiante. O'Kon es un ingeniero forensic qui investiga structuras construite que ha fallite. Ille decideva a usar iste mesme technicas pro probar que le pila de roccas es un pila de un ponte. Ille compilava informationes in le campo al sito mayan, e usava le computatores a integrar studios archeologic, photographos aerial, e mappas pro disveloppar un modello in tres dimensiones del sito e pro determinar le linea del centro del ponte, e pro discoperir le sito del contrafortes del ponte al latere del riviera, e pro mesmo reconstruer le ponte hypotheticamente. Iste ponte precolumbian habeva un longitude de 182 m, esseva un ponte suspension, facite de corda de cabannis, con duo pilas e tres arcadas. Jungente le centro ceremonial a Yaxchilan con su dominio agricultural in lo que es hodie Guatamala, le ponte habeva un arcada in su centro de 61.5 metros, le plus longe arcada in le mundo usque un ponte construite in Europa in 1377. Le citate mayan esseva situate stragicamente super le terra alte. Un curva in le riviera del forma del character grec omega, incircula le citate a tres lateres, e le sol approche al citate es interrumpite per alte montanias. Pluvias forte faceva le riviera virtualmente impassabile de junio a januario. "Sex menses del anno, il ha quasi 430-500 centimetros del pluvio, e le riviera es 12 metros supra su ripas. Durante le periodo de inundation Yaxchilan deveniva un insula," diceva O'Kon. Un ponte esseva essential pro le habitantes del citate de dense population pro facer possibile accesso a lor dominio, lor campos agricultural e pro le commercio, O'Kon diceva. Le pila de rocca--4 metros in altitude e 9 metros in diametro, esseva le parte de un structura de masoneria. Photographos arial obtenite in 1992 revelava le residue de un secunde pila de appoio al latere opposite del riviera, que esseva quasi submergite. Ambe pilas esseva construite con un interior de beton formate al sito e un exterior de petras de masoneria. "Illes formava un circulo e plenate su interior con pillares facite de beton formate in sito, justo como illes faceva lor templos e pyramidos. Le identification del contraforte que duceva al entrata grande del citate esseva le evidentia conclusive necesse pro reconstruer le complete function ceremonial del ponte. Un platteforma situate in un placia central e situate super le linea de centro del ponte, esseva un structura classic de un approchamento a un ponte," diceva O'Kon. Un scala ducente al altessa del platteforma coperite con heiroglyphicas anque esseva discoperite. Iste scala esseva le porta ceremonial al entrata al citate. Apparatos sculpite del petra anque esseva discoperite, e O'Kon crede que istos esseva le vias guidante pro le cordas de cabannis pro le cablo de suspension del ponte. "Io poneva tote iste informationes in le computator," diceva O'Kon. Io digitizava le mappas e entrava tote le information. Toto esseva in alineamento, le pillars, le contrafortes, e le platteforma ceremonial. Le requirimentos de designo pro le ponte mayan ha un parallela in criterios del designo de pontes de iste seculo. Ille es irate que archeologos ha traditionalmente classificate le mayanos como un cultura del etate de petra proque il ha necun evidentia que illes faceva utensilos metal. Ille diceva que le plus proximate depositos del ferro es 2500 km de Yucatan. In loco de ferro, le mayanos creava utensilos de un substantia plus durabile que le ferro, le jada. O'Kon refere al cultura mayan como" technolythic". Le mayanos esseva multo sophisticate e mathematicamente e scientificamente. Illes habeva le concepto de zero 700 annos ante le europeos, sin le influentia del arabes o chinese. Mathematicamente e astronomicamente le mayanos esseva multo avantiate. "Le societate de Yaxchilan esseva altemente disveloppate," ille addeva. "Illo esseva un citate fabulose, con templos de blanco scintillante super conillos terrassate." Stan Mulaik