Salute Li Hai, Il pare que tu ha un manco de tempore, dunque io forni le traduction infra pro le commoditate de te e de omnes. - Martijn Excusa me pro haber scribite isto in anglese. Io me trova in un situation multo urgente a communicar mi puncto de proque io apprenderea esperanto e lojban in addition a interlingua. Io vos inviara le version in interlingua plus tarde. Io crede que interlingua es un lingua international plus bon que esperanto pro multe rationes, inter le quales le plus importante es su esser plus facile que esperanto in le nivello de comenciante (como es mi experientia personal) e intermediari (tanto como io sape imaginar). Nonobstante, quanto al functionamento de qualcunque lingua como medio de communication inter parlatores non-native o inter parlatores native e non-native, le parlatores non-native de IA, EO e anglese inevitabilemente trova que alicun ideas perfectemente exprimibile in lor lingua materne sia difficile, si non impossibile, a exprimer in le lingua "auxiliar", sia IA, EO o anglese. Mi puncto es, nonobstante, que in esperanto, o ancora plus in lojban, es possibile formular multe ideas non exprimibile mesmo in vostre lingua materne in parolas de esperanto o lojban relevante e comprehensibile. Ma vostre chance de facer lo mesme in IA esserea multo minus grande, proque illo es quasi un lingua natural. On pote dicer "surtabligi"="poner...in un/le tabula" in esperanto, ma necuno pote usar solmente un parola a referer al mesme action in anglese o IA. Es possibile inventar parolas in Lojban pro dicer cosas ancora plus bizarre e forsan non commode a paraphrasar in alicun lingua natural. Ora, io debe admitter que mi proposito con apprender IA es communicar con interlinguistas e non-interlinguistas in "omne contextos normal", e in addition, a perfectionar mi anglese, durante que mi proposito con apprender esperanto e lojban es permitter me formular ideas que io non sape exprimer mesmo in chinese (il ha tantes de illos! Le anglese ha solvite parte de mi problema, ma lontan de satis). Io utilisa EO e lojban como instrumentos pro mi melioration mental. Io apprende e appoia IA pro le possibilitate de augmentar le capacitate de comprehension mutual, non solmente pro comprehension inter me ipse e personas con que io poterea haber contacto unilateral o bilateral, ma anque pro comprehension inter omne esseres human con linguas differente.