Populos Caucasoide in Nord America de Antiquitate?

Secundo le jornal _Science_, 10 de april 1998, in le prime septimanas de
April un helicoptero operante sub le direction del Corps de Ingenieros del
Armea in le Statos Unite discargava grande blocos de petra e gravella preter
le ripa del Riviera Columbia presso le village de Kennewick in le stato de
Washington. Le objecto de iste operation esseva a stoppar le erosion a un
puncto preter le ripa del riviera ubi un ancian skeleto de 9300 annos ante
le presente, cognoscite como "Le Homine de Kennewick" esseva discoperite
circa duo annos previe. Lo que es significante es que iste skeleto ha alcun
characteristicas caucasoide.

Totevia, anthropologos dice que iste operation va interrar le sito--ubi
additional ossos esseva discoperite justo duo septimanas ante isto--in loco
de proteger lo. Illes mesmo ha convincite le Congresso a passar un lege
interdicente le operation.  Mais proque le legislation non esseva finite
ante le Congresso vadeva in recesso, le lege non poteva stoppar le movimento
del terra.

Isto es solmente le plus recente torno in un lucta acrimoniose super un
trovata que, multe archeologos crede, poterea provider indicios importante
super le population del America antique. Octe anthropologos prominente ha
citate in judicio le Corps de Ingenieros del Armea, que ha le jurisdiction
del sito Kennewick, pro le permission a investigar le sito pro studiar
le ossos del Homine de Kennewick.  Mais le Corps vole dar le skeleto a
le Tribo de Umatillas, un tribo de indianos de nordest de Oregon pro
reinterramento, sub le Acto de 1990 pro le Protection e Repatriation de
Tumbas de Americanos Native (le indianos). Iste conflicto es un parte
de un plus grande lucta super qui va controllar le prehistoria american,
con le credos religiose de americanos native opponente le theorias ancora
evolvente de scientistas super le prime americanos.

Le scientistas in iste caso dice que le parve amonta del recerca que le
anthropologos ha jam facite super le Homine de Kennewick e alcun pauc altere
americanos antique suggere un diversitate surprendente intra le original
americanos, que da indicationes de un historia complexe e largemente
incognoscite. In lor opinion le question de qui esseva le prime americanos
es ancora non constatate.  Illes vole compler un analyse del ADN del
Homine de Kennewick, que le Corps interrumpeva quando illes sasiva le
skeleto.

Quando le ossos del Homine de Kennewick esseva discoperite initialmente,
le bureau del coroner appeleva a un anthropologo forensic independente a
examinar le skeleto.  Basate super le forma del cranio, ille opinava que
le skeleto esseva de un pionero caucasian del 19ne seculo.  Mais quando
le datos de radiocarbon indicava le skeleto a esser de 9300 annos in le
passato, le Corps sasiva le skeleto in preparation a retornar lo al
Umatillas pro interramento.

Le Homine de Kennewick non es le sol skeleto que es dissimilar al indigenas
contemporari. Un altere skeleto cognoscite como le Homine de Caverna del
Spirito, que es de circa 9000 annos in le passato non es similar al
indigenas moderne.  Le volta cranial es plus alte, e le facie es plus
stricte.  Intra populos vivente, le Homine de Caverna del Spirito es le
plus similar al Ainu de Japon, le gruppo de populo que originalmente
populate ille archipelago.

Ben que le analyse de ADN de skeletos antique sovente discoperite in le
Statos Unite es similar al ADN de indigenas moderne, isto possibilemente
non es le caso con skeletos como le Homine de Kennewick e le Homine de
Caverna del Spirito.  Secundo _Science_ 24 de april 1998, al fin de April in
Salt Lake City, un anthropologo molecular del Universitate Emory in Atlanta,
Georgia, SUA, Theodore Schurr, presentava resultatos de un studio de ADN
de e indianos american, europeos, e asiaticos. Le nova datos basate super un
marca genetic nominate appropriatemente "Lineage X" suggereva que il ha un
ligamine definite inter eurasianos e nord americanos.  Iste marca genetic es
multo rar in le ADN de moderne indianos american. Nonobstante illo existe.
Illo es anque incognoscite in le ADN de asiaticos. Mais illo ha essite
discoperite in populationes eurasian, p.e. infra alcun finnese, italianos e
certe israelis. Il anque ha alcun indicationes que il anque appare in turcos,
alcun espanioles, e bulgares.

Certe anthropologos qui studia le origines del population de Nord America
ante le arrivata del europeos, dice que iste connexion inter certe
indianos e populos de eurasia pote explicar le casos problematic de certe
skeletos de characteristicas caucasoide de un antique etate in Nord America,
como le Homine de Kennewick e le Homine de Caverna del Spirito.
Possibilemente populos eurasian ha migrate a nord America in antiquitate.

--traducite per Stanley Mulaik