EURO MP IN INTERLINGUA LE 11ME DE DECEMBRE 1998

Per Tony Robinson
Traducite per Stanley Mulaik  (in le Districto de Newt Gingrich)

EUROSCEPTICOS CERCAR A RUINAR LE UE IN UN DESPERATE RESISTENTIA FINAL

Euroscepticos desperate a poner le UE in chaos es expectate a montar
un resistentia a trenchea final in Strasbourg pro condemnar le
Commission Europee super su administration de fundos public.

Le destructores va comenciar lor manovras a un reunion del committee
omnipartitari de regulas in Strasbourg lunedi le 14 de decembre. Illes
va cercar a eliminar un regula existente que require un majoritate
absolute del Parlamento - 314 membros - a passar un motion a
refusar un discarga budgetari.

In loco, illes vole un majoritate simple del membros votante a refusar
le discarga - un decision que, si passate, es expectate per multos a esser
sequite per motiones a dismitter le integre Commission de 20 membros.

Le euroscepticos - piccate post un defaite in le committee del controlo
budgetari in Brussels al manos del Gruppo Socialista jovedi le 10 de
decembre - es additionalmente expectate a levar motiones procedural al
comenciamento del session le lunedi proxime e a resuspender lor demanda
pro le refusa de discarga pro un voto le jovedie proxime.

Leader del Gruppo Socialista Pauline Green accentuava que le Parlamento ha
ganiate progresso importante in modernization e reforma in le Commission
Europee.

Illa diceva: 'Nos nos concentrava super le cultura subjacente del secretessa
al Commission que ha exacerbate le tensiones circa le discarga del budgeto.'

Sra. Green attaccava le irresponsabilitate de 'europarlamentarios affamate
pro le mention in le pressa' qui illa accusate de nutrir le media con
insinuationes e revelationes insubstantiate.'

Illa diceva: 'Aqueste europarlamentarios ha interesses personal - non le
interesses del contribuente europee - in lor cordes.'

In responsa a un demanda directe de Sra. Green, Presidente del Commission
Jacques Santer ha explicate reformas de personal e administration que
ille ha prosequite tanto ben como planos additional pro mondernizar le
Commission.

Diceva Sra. Green: 'Io saluta le responsa de Sr. Santer, e nos ora va
sequer tote le questiones.  Nos va continuar a stimular e pulsar le
Commission a mondernizar e reformar se.'

PLUS EURO MP IN INTERLINGUA 12 DECEMBRE 1998
Per Tony Robinson
Traducite a Interlingua per Stanley Mulaik

GERHARD LE TIMONERO

Membros principal del Gruppo Socialista va tener discussiones con le
entrante Presidentia german del Consilio UE in Bonn le 14 e 15 de januario.

Le europarlamentarios, directe per leader del Gruppo Pauline Green, va
incontrar Cancellero Gerhard Schroeder le 14 de januario.  Ministros
participante in le discussiones le die sequente include Karl-Heinze Funke
(agricultura), Guenter Verheugen (affaires estranier), Otto Schily
(Secretario del Interior), e Walter Riester (empleo).

Detalios de facilitates pro le pressa al discussiones essera annunciate
plus tarde.

LE PICTURA PLUS GRANDE

Radiodiffusioneros del paises del alargamento va esser in le lista de
oratores a un reunion special del gruppo omnipartitari super le politica
cinemari e audiovisual.

Le reunion de 17.30 martedi le 15 de decembre va tener se in Palais 4.

Oratores include Mihaly Revesz, Presidente del Commission National del
Television e Radiodiffusion de Hungaria, e Jacek Fuksiewicz, Director
Administrative de Canal+ in Polonia, tanto ben como le director del
politica audiovisual del Commission Europee, Jean-Michael Baer.

HUNGARIA A PARTICIPAR IN PROGRAMMA MEDIA II.

Le PE es expectate a approbar un reporto que rende capace Hungaria a
participar in le Programma Media II.

Le action reflecta preoccupation super activitate aggressive del SUA in
paises de Europa oriente e central allineante se pro adhesion al UE.

Pro qualifica pro le adjuta, Hungaria - le sol pais con un structura
legislative e administrative que qualifica - debera allinear su leges
in linea con le directive UE de Telediffusion sin Frontieras e le Convention
del Consilio de Europa super le telediffusion transfrontieric.

FERIA DE LIBRO SOCIALISTA

Obras scripte per membros del 214-robuste Gruppo Socialista de tote le
15 paises del UE va esser exhibite a un Feria de Libro Socialista in le
Parlamento de Europa martedi le 15 de decembre.

Le Feria de Libro va haber loco in le tertie etage del Centro del Pressa.

Leader del Gruppo Socialista, Pauline Green invita jornalistas a incontrar
le autores durante biber un cocktail a 18.30 le 15 de decembre.

PREMIO SAKHAROV

Le Premio Sakharov del PE de euro 15.000 pro le Libertate del Pensata essera
presentate a Dr. Ibrahim Rugova - un albaniano de Kosovo - a mediedie
mercuridi le 16 de decembre.

Dr. Rugova, le presidente del Liga Democratic de Kosovo, ha directe le
opposition pacific al Regime Serbe in le provincia yugoslave.

Previe recipientes del premio include Nelson Mandela, directrice del
opposition burmese Aung San Suu Kyi e dissidente chinese Wei Jingsheng.

REPORTO SUPER LE CHOCS

Anxietates del effectos de chocs economic a un o plus paises UE post
le moneta unic deveni in effecto ha stimulate un reporto per le experto
economic del partito Labor nederlandese Alman Metten super le rolo que
le UE pote assumer.

Sr. Metten vole le UE a preparar se pro si-nominate chocs asymmetric -
impactos super le economia de un o alcun pauc paises - que ille
time va remaner a risca post le union economic e monetari.

Estimatos producite pro le Gruppo Socialista suggere que mesmo si le risca
del choc asymmetric esseva tanto rar como cata 20 annos pro tote pais in
le moneta unic, le Union confrontarea un problema cata duo o tres annos.

Sr. Metten avisa le statos membros e ambe lateres del industria a
considerar le creation de un schema del assecurantia similar a aquello
in uso in Finland - un fundo de stabilization pro compensar pro le
impacto de choc economic.

CRUELITATE A LEPORARIO

Preoccuption super le cruelitate de propagatores a vetere leporarios
es levate in le Parlamento Europee.

Socialdemocrato svedese Jan Andersson ha presentate un question parlamentari
que indica que 'canes non plus regardate como in forma pro le cursas es
subjecte a cruelitate considerabile.'

Propagatores pote reclamar subventiones euro, ille dice, sub schemas
de appoio agricultural.  Ora Sr. Andersson vole un annuncio del Commission
super junger le adjuta a tractamento human del animales.

DERECTOS HUMAN IN POLITICA ESTRANIER

Questiones de derectos human debe esser constructe in le politica
commun estranier e securitate del UE, dice leader socialista grec in
le PE Yannis Roubatis in un reporto pro un debatto a Strasbourg.

E, ille adde, le Commission Europee debe appunctar un Commissario pro
Derectos Human.

Tal developpamentos, ille dice, renderea capace le UE a 'mover de
un manifesto de bon intentiones a un politica que implementa aqueste
alte objectivos'.

In un reporto distincte commemorante le cinquantesime anniversario del
Declaration Universal de Derectos Human, portugese socialista Jose Barros
Moura --le autor aqueste anno del reporto annual del EP super le
derectos human in le mundo - attacca Jamaica pro denegar gentes que
illo condemna al morte le opportunitate de prender lor caso al Committee
de Derectos Human del NU.

Ille focaliza Trinidad e Tobago, exprimente anxietate que illo va
resumer le punition capital.

DERECTOS EURO HOMOSEXUAL

Eurocratos homosexual es denegate le mesme derectos e privilegios como lor
collegas heterosexual, dice danese socialdemocrato Freddy Blak.

In un question parlamentari summarizante le problema, Sr. Blak dice: 'Aquesto
es particularmente le caso pro le derectos e privilegios que le sposas
de personal UE normalmente recipe e applica mesmo si personal homosexual
ha entrate se in un association registrate que corresponde a maritage
in lor proprie pais.

Urgente un cambio a regulas pertinente al personal UE, Sr. Blak cerca un
annuncio del Commission.

DERECTOS DE COMPRATORES

Socialistas va direger motiones a dar compratores melior salveguardas
quando un reporto per german socialdemocrato Annemarie Kuhn es debattate
in le plenario decembre a Strasbourg.

Le salveguardas include le derecto a retornar al fabricante mercantias
defective comprate in un altere pais del UE.

Tote le mercantias vendite in Europa haberea un garantia de duo annos -
e defectos que appareva in le principal sex menses post livration esserea
presumite haber existite al tempore del livration.

Sra. Kuhn equalmente vole que fabricantes qui vende mercantias in plus que
un pais UE a esser requirite a includer in lor pacchettage le detalios de
contacto de al minus un bureau de reclamation in le paises in question.

INFORMATIONES SUPER INTERLINGUA

Pro apprender plus super le lingua auxiliar pro Europa, visita nostre
sito in le tela transterrestre (le TTT) a www.interlingua.com

Interlingua non es patronate per le Gruppo Socialista de Europa. Aqueste
servicio de traduction es providite libere solmente pro demonstrar le
utilitate de interlingua in servir como un lingua auxiliar europee.





EURO MP es un "jornaletta" de novas del Partitos Socialista de Europa.