Marteno,
  Le duple themas de certe verbos in -er es trovate in tote le
linguas europee a que ha essite prestate iste formas del latino.
Mesmo le germano ha extrahieren/Extrakt, Agent/Akt.  Anglese sovente
ha prestate a illo del latino le secunde thema, le thema "supinal",
que corresponde al participio passate, a devenir le verbos de anglese,
"to act", "to select", "to elect", "demonstrate" (non un verbo de
duple thema, mais il illustra le maniera in que un verbo anglese es
basate super le participio passate del latino).  In un senso isto es
un "irregularitate", mais il es un irregularitate que es multo
familiar a plus que 900.000.000 gentes, e face necun difficultate
in usage.

In interlingua nos pote usar le thema supinal pro le participio
passate, e io ora incoragia su usage proque isto face le derivativos
basate super le thema supinal plus regular.

Io selige, io ha selecte; io age, io ha acte; io possede, io ha possesse;
illo frange, illo ha fracte.

Alora le regula pro facer substantivos in -tion de verbos es a adder
-ion al participio passate post removar le -e final.

seliger, selecte, selection
ager, acte, action
extraher, extracte, extraction
posseder, possesse, possession
abstiner, abstente, abstention
absolver, absolute, absolution

Le supinal forma es facilemente obtenite per retroformation de
parolas in -ion.


Le regula continua mesmo con altere verbos:

demonstrar, demonstrate, demonstration
consolar, consolate, consolation

Stan Mulaik