Car amicos,

Habente legite le commentario per Ingvar al texto de Ensjo super le
refugiatos curde, io ha volite dar anque mi remarcas. Tamen, il me pare
plus clar que io non face un nove lista de remarcas, ma que in vice de isto
io rescribe le articulo secundo mi proprie ideas, utilisante anque le
remarcas de Ingvar. Alora il essera plus facile pro Ensjo de facer su
version definitive que ille poterea  submitter al controlator final (Ingvar?).

De novo io regratia Ensjo pro su bon labor de traduction.

Salutes amical de Piet

--------------------------------------------------------------------------------------------

DRAMA DEL REFUGIATOS CURDE EXIGE  SOLUTION HUMANITARI

Le Parlamento Europee  lauda le action del autoritates italian e demanda plus
de solidaritate al  Statos-Membros.

(Centos de refugiatos curde se dirige clandestinmente al costas del  Union
Europee. Interim, in le terra promittite, le gestion del situation deveni
plus e plus difficile. Attente le Parlamento Europee prendeva position,
demandante un solution politic pro le problema curde. Intertanto le
europarlamentarios non sparnia laudes al autoritates italian pro le maniera
correcte e humanitari in le quales illes ha tractate le refugiatos curde.)

Illes arriva a Europa via Italia e Grecia, fugiente del repression politic o
simplemente in cerca de melior conditiones economic. Illes es curdos e
paga a trafficatores pro interprender periculose viages verso un promittite
Union Europee. Le parlamentarios europee sape que le affluxo de refugiatos
curde, como le question del immigration clandestin in general, solo pote
esser tractate si le problemas que es su origine essera resolvite.

Ergo, le resolution que le Parlamento Europee approbava, demanda al
Statos-Membros que illos adopta un politica externe commun que responde
al defia ponite per le repression del populo curde e per le consequente
migrationes, prendente un initiativa international que pone fin al
operationes militar turc in le nord de Irak, como anque  al conflictos in le
sud de Turchia.

Ma le parlamentarios europee sape que le crise curde ha anque un
dimension criminal: le traffico de refugiatos curde, realisate per gruppos
international que collige lucros al costo del suffrentia human. A causa de
isto le resolution approbate per le Parlamento Europee exhorta le
Statos-Membros a interprender un action specific e coordinate e exequite
per le policia international con le eventual auxilio de Europol a fin de
restringer le traffico de esseres human.

Le Parlamento Europee considera in ultra que iste situation demonstra le
necessitate del definition de un politica commun de asylo, de visas e de
immigration, que permitte resolver le problema del immigration
clandestin e le menacia que isto representa al abolition del frontieras
interne del Union Europee. Del altere latere le Parlamento Europee
accentua anque le necessitate del Statos-Membros proceder a un
repartition juste del oneres que representa iste influxos de personas
qui besonia protection, considerante que il se tracta de un problema
commun a tote le Union Europee, e non de un problema specific de un
o altere Stato-Membro geographicamente plus exponite a iste typo de
problemas.