Kjell,
   In le Statos Unite il ha multe optiones de le qual a selectionar.
On pote esser un atheista, o un agnostic, o adherer a iste o ille
religion o secto.  Quando un puero mi matre me diregeva al Ecclesia
Episcopal (le Ecclesia de Anglaterra), proque illa ha essite un
Methodista, e illo esseva le plus similar al Methodismo del varie
Ecclesias Protestant in le vicinitate de nostre casa.  De plus le
proprietrice qui habitava le apartamento supra le nostre veniva a iste
ecclesia, e il esseva conveniente a vader con illa e su filias (adulte).
In Salt Lake Citate nos esseva in le minoritate, proque le mormones
esseva le fide dominante. On dice que Salt Lake Citate es le sol
citate in le qual un judeo es un gentil. Salt Lake Citate habeva su
proprie Riviera Jordan que flue de un laco de aquas fresc a un laco
de aqua saline.

   Como io ha dicite previemente, quando io esseva 15 io deveniva un
Baha'i post incontrar un biologo visitante qui esseva de iste fide.
Mais quando 21 io decideva a partir me del Baha'is post incontrar le
buddhismo de zen.  Io non deveniva formalmente un buddhisto. A iste
puncto io opina que mi patre approbava de mi manco de religion.
Ille esseva como un juventute un catholic (como le majoritate de
lithuanos), mais post decider que su parocho esseva un idiota
superstitiose qui menacia su grege con le periculos del damnation pro
isto e ille culpabilitate, ille cercava in altere partes.  Pro un
certe tempore ille esseva un Protestante, mais quando ille e matre
se moveva a Texas e voleva a visitar le Ecclesiva Baptista in lor
vicinitate, on demandava lor "credentiales" de un previe Ecclesia,
e isto offendeva mi patre.  Ille diceva que ille esseva Presbyteriano,
mais in su annos senior ille deveniva un atheista patente, subscribente
al "Skeptical Inquirer" e altere jornales atheistic. (Ille anque
esseva un biologo con un credo feroce in le evolution.  Io es anque isto.)

   Mais io non es un ordinari atheista.  Un tal credo es troppo
negative.  Io dicerea que io es plus un pantheista--vos es Deo e le
Deo es le Mundo o le fundo del Mundo.  Deo es le ration pro que alique
existe e non nihilo.  Io es anque influite per le theologia de Paul
Tillich, qui esseva un forma de atheista in tanto que ille opinava que
a creder que le Deo es un esser que existe es le prime passo al
atheismo.  Un Esser existente es un esser finite que existe inter
altere esseres--non le fundo del existentia. De plus il es facile a
refutar tote le argumentos pro le existentia de un Deo. E le problema
del existentia de Deo resolve al problema del existentia de iste o ille
cosa, alquanto similar al question del existentia de antimateria o
bosones, un question resolvabile per le scientia.  E sovente le scientia
argue que il ha necun tal esser in le mundo, o remane agnostic.  Mais
pro Tillich un Deo que mermente existe non es digne de vostre preoccupation
ultime.  Si un computator le largessa de un galaxia demandava que on
Lo adora, on certemente esserea caute in su tractamento de illo, mais
illo non es un objecto proprie de vostre preoccupation ultime, proque
il semper ha le question, proque il existe io e iste computator magne
e non nihilo? Le computator magne non es le responsa al problema del
existentia mesme.

Assi, como io diceva, Santayana e io es similar in tanto que Santayana
habitava un convento e amava le ritual del Ecclesia Catholic, mais esseva
un atheista.  Mi attitudine verso religion es tolerante quando illo non
deveni idolatrose per tractar le medio finite de su adoration como le
objecto de adoration mesme. Mais io accepta le mysterio del vita e del
existentia, e le poter de iste mysterio pro tote gentes.


Quanto al religion in le Statos Unite, il semper ha un tension inter
illes qui crede in un religion e illes que non crede. E il ha le
tension inter le membros del varie fides.  E gentes move de un religion
a un altere--le numero de positiones de que a selectionar es grande.
Hodie in le Statos Unite le fundamentalistas, particularmente le
Baptistas ha politicizate se.  Il es un phenomeno sociologic del
movimento de urbes rural al grande citates, le dislocation, le
chocco del vita "immoral" in le citates, le senso del insecuritate
in empleo, etc..  Le fundamentalistas vide le "liberales" como le
fonte de lor problemas.  Illes vide le governamento imponente regulationes
que interfere in lor vitas, in lor affaires commercial, in lor relationes
a altere gruppos e racias, appoiante le inproductive e le indolente.
Le governamento ha le religion del humanismo atheistic e impone isto
super tote le mundo.  Il es interessante que le fundamentalistas le
plus reactionari es illos del citates, durante que le fundamentalistas
ancora in le urbes rural es plus "progressive", proque in lor previe
situationes, lor religion esseva le base pro opponer le reactionari
leaders local. E progressive ideas es un arma contra le reactionarios.
Un paradoxo!  Le explication es que le fundamentalistas del citates
senti le dislocation e incertitude del vita mesmo plus que le
fundamentalistas in le urbes rural, e illes gravita verso solutiones
simple e concrete al problemas del finitude de lor vitas. E illes
vide le humanismo modernista del bureaucratos in Washington como le
fonte de lor problemas.  Ancora le fundamentalistas non es le majoritate,
mais lor poter politic cresce.

Stan Mulaik