Io ha finite le prime version del quite parte (ex octo
partes) del curso de conversaion in interlingua que io
nunc prepara. Tosto io lo inviara a Thomas
Breinstrup.
Ante multe tempore, io habera finite le prime
versiones de omne le partes. Io tunc va preparar un
version in anglese de omne illos pro controlar le
texto in interlingua.
(Quando io scribeva le section sur le syntaxe in mi
curso in "Interlingua in interlingua" io anque
preparava un version in anglese, "English Syntax
Sketched Out", pro controlar le texto e le structura
de iste parte del curso.)
Ecce le summarios del sex scenas de iste quinte parte
del curso de conversation:
---
SCENA 1: Paris, in un centro de conferentias: Petro
parla a John Melville e le accusa de dishonestemente
essayar finger esser un possibile cliente sue pro
extraher ex ille informationes commercial confidential
sur su compania.
Petro deveni multo irate, e John Melville essaya
calmar le dicente que in le affaires tal practicas es
commun. Gerardo Florette interveni e porta Petro via,
suggerente que illes bibe alique e oblida le affaire.
Petro finalmente vade con Gerardo, ma non sin unes
parolas menaciante a John Melville, qui pare
surprendite e indignante e completemente sin regrets
pro lo que ille ha facite. Petro e Gerardo vade a un
parve cafe in un area de Paris que Gerardo cognosce
ben.
Petro se calma e demonstra un certe placer pro
participar in le bonhomia del vita in le cafes
parisian. Illes parla sur le conferentia, e le duo es
de accordo que illo es un guasto de tempore. Ni John
ni Petro ha fame, ma illes vole haber un secunde
bibita e continuar lor activitates in un altere parte
de Paris, sin dubito pro continuar lor libationes.
---
SCENA 2: Paris, le officios de Trans Infra: Le
matino post lor vespere de biberages, Petro e Gerardo
es un pauco malade, specialmente Petro, e Gerardo da a
ille un pauco de aspirina e un consilio assatis
stranie pro remediar su grandissime dolores de capite.
Post que Petro ha inglutite su aspirina, ille deveni
un pauco minus malade, e un senior Legrande le apporta
a un sala de conferentias e le presenta a unes altere
personas qui travalia pro Trans Infra. On da a Petro
un invitation pro presentar un discussion sur le
projecto de Geneva, e ille accepta.
Ille suggere que illes organisa cata mense reuniones
regular de ingenieros senior de maniera que omnes pote
intercambiar e actualisar le informationes que illes
ha accumulate sur le transporto urban, addente que
cata reunion esserea in un citate europee differente.
Quando Petro fini su discussion, le senior Legrande
parla sur su opposition al projecto. Ille dice que
ille non pote inviar su ingeniero le plus senior a un
reunion cata mense sin interrumper le travalios de su
officio de un maniera inacceptabile. Ille pote inviar
al reunion un ex su ingenieros plus juvene, ille dice,
ma non un veterano.
Petro essaya explicar al senior Legrande le
importantia del presentia del ingeniero le plus
senior, ma sin successo.
---
SCENA 3: Le officio de Geneva: Nos trova Petro in le
officio ubi Liliana, le assistente de Catherina, ha un
message de Alicia pro ille. Alicia annuncia que illa
tosto essera in Geneva, ubi illa recomenciara su
travalio como su secretaria.
Petro es multo enoiate e demanda a Liliana si illa
sape usar un telex. Liliana responde que le machina
debe esser non troppo difficile a usar, e Petro dicta
un message pro Alicia, indicante breve ma clarmente
que ille non vole que illa veni a Geneva. Post unes
parve difficultates, Liliana comencia le transmission
del message, e Petro es multo plus felice.
---
SCENA 4: Le officios de Geneva: Petro es con
Catherina. Ille es multo preoccupate a causa del
possibilitate que tosto Alicia venira a Geneva si illa
non recipeva su telex.
Catherina sympathisa, ma illa adde que pro illa il
esserea interessante cognoscer Alicia un pauco. Petro
tunc monstra a Catherina un annuncio solicitante un
ingeniero pro un position in Mexico. Ille crede que
ille non ha assatis a facer in Geneva e que ille
activemente considera le possibilitate de solicitar le
position.
Ille demanda a Catherina si illa darea a ille un
referentia, e illa responde que illa non haberea ulle
problema in recommendar le pro le position.
---
SCENA 5: Le officio in Geneva: In iste scena Petro
parla con Catherina sur su viage a Paris. Lo que ille
ha a dicer es multo discoragiante. Ille dice reporta
que le conferenta esseva un fiasco e que le reunion
con le personal de Trans Infra esseva etiam pejor.
Ille explica como le senior Legrande non permittera
que su ingeniero senior vade a reuniones mensual trans
Europa. Il es obvie que Catherina cognosce Legrande,
e illa decide resolver le problema immediatemente.
Illa telephona Roberto Demur e describe a ille le
problema con Legrande. Demur appoia le position de
Catherina e suggere que illa parla directemente con
Legrande.
Illa tunc parla a Legrande e simplemente demanda que
ille invia su ingeniero senior a Geneva lunedi le
tertie die del mense con su passaporto in ordine.
Legrande dice que ille facera lo que Catherina vole.
Petro es multo impressionate con le authoritate e le
competentia de Catherina e la invita a dinar con ille.
Illa dice que illa volerea acceptar su invitation ma
que illa ha troppo a facer.
---
SCENA 6: Le officio de Geneva: Petro veni a vider
Catherina in su officio. Quando illa le vide, illa
memora que Petro voleva que illa scribeva un littera
de referentia pro ille, e illa dice que illa regretta
non haber lo scribite.
Petro tamen essaya invitar Catherina a dinar o forsan
solmente haber un bibita con ille. Durante que illes
explora le possibilitates, Liliana les interrumpe,
dicente que Alan Tanner ha essayate parlar con illa
per telephono tres vices, ma Catherina non esseva in
le officio.
Liliana tunc narra le detalios del message de Alan
Tanner, dicente que ille ha trovate un restaurante
multo bon ubi illes poterea vader a dinar, que a ille
placerea que illa portava le mesme roba que illa
habeva portate le sabbato previe.
Le telephono tunc sona un altere vice, e Catherina
responde. (Liliana pensa que il es Alan qui parla.)
Illa narra a Petro le detalios del relationes inter
Alan e Catherina.
Petro responde de un maniera multo breve, indicante
possibilemente que ille es enoiate. Ma Catherina
retorna e dice que illa ha parlate con Alicia, qui
diceva que illa tunc habeva comenciate su viage a Geneva.
__________________________________________________
Do you Yahoo!?
Yahoo! Platinum - Watch CBS' NCAA March Madness, live on your desktop!
http://platinum.yahoo.com
|
