LE VENGIANTIA DE FLORIDA
Le francese lucta contra un invasion de ranas gigante del Statos Unite

Florida es le longe peninsula al sud est del Statos Unite e il ha essite
invadite per numerose species de fauna e flora de altere partes del mundo,
que ama le climate tropic de iste stato. Lor populationes cresce sin
limitates proque illes ha necun predatores local. Il ha le formicas blanc
gigante del Phillipinas, que mangia tote le ligno, il non importa qual.
Il ha le formicas de foco de Argentina que labora a converter le integre
stato a in un sol formicario. Ben que illes es formicas parvissime, illes
es multo aggressive e ha un multo dolorose piccatura, que es multo "calide",
"como le foco", que milles de illes va dar alcuno o alque que sta super
lor formicario. Il ha numerose plantas exotic que ha escappate le
casas del lor importatores e ha devenite mal herbas in le ambiente.
Mais ora il pare que Florida ha su vengiantia. Illo ha exportate su
ranas gigante pro devorar le fauna e flora de Francia.

In un articulo per Svein Michelsen in le web il ha un conto de un
invasion de ranas gigante in le region de Aquitaine in le sud de Francia.
Iste ranas ha entrate le pais illegalmente del Statos Unite e hodie devora
le fauna local.

Il face 20 annos desde le introduction del ranas al pais como un joco.
Mais hodie le authoritates local non plus vide le humor. De un population
initial de sex ranas il ora ha plus que dece milles de lo que le francese
nomina le "ranas de Florida".

Le ranas mesura a un maximo de 67 cm in longitude e lor peso es tanto
grande como 2,025 kg.  Le ranas de Florida es multo plus grande que le
ranas local, le qual es multo plus deliciose.  De facto le francese
non digna le ranas gigante como digne de mitter se super le tabulos
de dinar francese.  Illes qui ha mangiate le gambas del ranas gigante
dice que "illos son disgustose!"

Mais il non es le palato mais le ambiente que es le preoccupation
principal del officiales local.  Le ranas gigante es omnivores e
mangia le pisces, le anates juvene, le aves e le ranas plus parve local.
De facto illes pare mangiar toto lo que illes incontra.

Secundo un portavoce de un organization pro le conservation del ambiente
in le region, "Isto es un real menacia al ambiente de aquas fresc. Nos
debe facer alque ante que il es troppo tarde.  le superviventia de plure
species indigine se depende de nostre actiones."

Officiales del ministerio del ambiente local ha promulgate instructiones
pro eliminar le ranas.

Le instructiones mesme pare suggerer que le francese es facie a facie
a un mesmo plus grande e plus periculose inimico:  "Loca le ranas
precisemente. Marca le area e appella pro un specialista." Proque
le necessitate pro un specialista?  Le explication es multo simple.
In lor enthusiasmo de eradicar le ovos del ranas gigante, le gentes
local ha mesmo destruite le larva de ranas de species local que on
vole proteger.  Il require un specialista qui pote distinguer le ovos
del ranas gigante del ovos del plus parve species.

Naturalmente le problema es que in Francia il ha necun predatores
pro le ranas gigante.  In Florida le alligatores controla le population
del ranas gigante.  Assi, tu pensa que tu ha le solution!  Introducer
le alligatores al ambiente de Francia!  Si, un excellente idea.....

Scripte in interlingua per Stanley Mulaik