LITTERA AL REGINA AL DIE DE INTERLINGUA
 
Regina Margrethe II de Danmark recipeva un salute de felicitationes
ab le multe interlinguistas, qui se assemblava le 15 de januario presso Neerbek
 in Copenhagen pro celebrar le Die de Interlingua.
   Margrethe poteva justo iste die celebrar su 25-nte anniversario
como regente de Danmark. Dunque il esseva natural que le assemblea signava un
 salute de "bon fortuna e felicitationes". Le littera,
que brevemente explica que es le Die de Interlingua, esseva post le
reunion inviate al majordomo major del majestate.
   In toto, 12 adultes e tres infantes - de istos un participante ab
Aarhus, un altere ab Svedia - celebrava le die durante duo horas
agradabile (16.30-18.30). Joergen Kofod-Jensen, presidente del Union Danese pro
 Interlingua, teneva un breve discurso anecdotic super le prime annos
con interlingua in Danmark sub le titulo "En temmelig gammel students
 bekendelser" (Le confessiones de un studente assatis vetere
).
   Un collection de articulos super interlingua publicate in le
pressa danese e international durante 1996 trovava grande interesse; illo
 comprehendeva anque brochures publicate per museos danese in
interlingua.
   In occasion del die, Hans Neerbek habeva recercate su archivos pro
trovar nomines e adresses de personas qui in le 1960s passava le examines de
 interlingua al Gymnasio Oestersoegade in Copenhagen,
 ubi ille inseniava interlingua. Un serie de circa 25 personas recipe
ora un littera ab Interlingua:
   "Car amico. Rememora tu me - Interlingua? Nos nos incontrava in le
juvene dies gai quando nos credeva in tante possibilitates in le vita. Pois
 nostre vias se divergeva, e tu habeva multe altere bo
n interesses. Ma si il es ver que 'ancian amor non oxyda', alora tu
pote monstrar lo sin que illo te costa multe obstaculos, tempore o moneta.
 Deveni abonato de mi revista, Panorama. Tu non te obliga
 a ulle altere cosa - ma tu supporta assi le labor de mi infantes in
le mundo, e pro isto illes te essera grate. Amical salutes! Tu sempre devote
 Interlingua"
   In cata inveloppe essera le littera ab Interlingua e un specimen
de Panorama (novembre-decembre).
   Omnes habeva duo agradabile horas con multe parlar, e alcunos
prendeva usa del occasion pro comprar alcun libros ab le parve exposition de
 litteratura in interlingua.
 
-----------------
 
Io es curiose apprender novas ab altere partes del mundo,
eventualmente per inviar lo directemente a me, per favor.
 
 
Con mi optime salutes
Thomas Breinstrup
--------------------------------------------------------
Thomas Breinstrup, journalist/jornalista
Berlingske Tidende, Produktionsredaktionen
Pilestraede 34, DK-1147 Koebenhavn K, Danmark
Internet: [log in to unmask]
Telephono: (+45) 33 75 28 07. Telefax: (+45) 33 75 20 20
--------------------------------------------------------