Car Andrew Juhasz,

            Tu tocca a un puncto que io considera multo importante: libros in interlingua!
            Primo: io a pena comencia studiar iste capturante lingua international e io sovente me demanda perque il non ha essite ancora publicate in interlingua, per exemplo, obras como illos scribite per Toma Macovei -- "Le Vita Anecdotic del Homines Illustre", "Ab le auro spiritual del scena e del schermo", "Joieles spiritual", "Miscellanea, insolite creationes spiritual" (mentionate in Historia de Interlingua - Biografias) -- le quales placerea, io vermente crede, multe interlinguistas si non totes qui los poteva leger. Il va sin dicer que io spera que on succede a transferer al mundo digital le "multissime paginas" del "Dictionario encyclopedic de interlingua" que nos ha lassate "scribite per machina a scriber" ille professor romanian.
            Secundo: io ha trovate multo difficile a acquirer libros (de papiro) in interlingua, ben que in le interrete io trova assatis bon material -- articulos, contos, reportos, cursos (includente audio files), biografias, etc.  Sed in Esperanto, durante que io lo studiava, alicun annos antea, io poteva comprar amplissime bibliografia, mesme le sacre Biblia, malgrado que le signos diacritic que existe in le lingua de Zamenhoff debe render incomparabilemente plus difficile a imprimer libros en Esperanto quam in interlingua.
            Tertio: le problema del pagamento. Io vive in Brasil e io non ha discoperite ancora como acquirer (pagar pro) un libro in interlingua e reciper lo per le posta.
            Io nunc vide que iste problema non es solmente mie.
            Amicalmente,

                        Carlos Alberto Santos
                        Aracaju - Brasil

--
Archivos e disabonar: http://listserv.icors.org/archives/INTERLNG.html