LE EUROPA HA UN GRANDE INTERESSE IN LE VOTO IRAKIAN
per Thomas Friedman, columnista del New York Times

Traducite per Stan Mulaik

Paris -- Il ha solmente un cosa que on pote dicer super le electiones
irakian: illos va esser o le fin del comenciamento, o le comenciamento
del fin.

O le irakis sorti in grande numeros pro sasir le controlo de lor proprie
constitution--e io pensa que illes va facer lo--o le insurgentes fascista
impedira les de facer lo, in tal caso le equipa de Bush debera mover se a
plano B.  Lo que es triste es que exactemente quando nos ha attingite
un momento decisive, le Occidente es totemente dividite. Toto de que le
europeos se preoccupa es le abilitate de dicer, "Nos lo diceva a te" a
George W. Bush.  Que a facer le matino post "Nos lo diceva a te"?  Ben,
le europeos equalmente non ha un plano B.

Depost 9/11, io ha arguite que le guerra contra le terrorismo es
realmente un guerra de ideas de intro le mundo islamic--un guerra
inter illes qui vole construer muros circa Islam pro excluder le modernitate
e a defender lo con un culto de suicidio, e illes qui vole portar le Islam
a in le seculo 21me e preserver lo como un fide de compassion.  Iste
guerra de ideas non es un guerra que le Occidente pote facer; illo solmente
pote promover lo.  Le islamitas  debe facer le lucta de intro Islam. Isto
es lo que es a interesse in le electiones irakian, le principe battalia
in le guerra de ideas post 9/11.

On non pote vincer iste guerra con truppos--solmente con le sortimento
del populo. Isto es un guerra inter le votatores e le insurgentes--le
ballotas contra le bollettas.  E le gentes qui comprende aquello le melio
es le insurgentes fascista.  Aquello es proque illes non dirige lor attaccos
super le truppos american, mais super le obreros del electiones,
le candidatos, le officiales local, e le policia. Le insurgentes ha solmente
un credo: "Irakis non debe votar--il debe non haber alcun expression
authentic del voluntate del populo.  Proque, si il ha un tal expression,
le mundo va vider que isto non es un guerra inter moslemes e
occupatores infidel, mais inter moslemes con mal ideas e moslemes
con ideas progressive."

E a iste decisive junctura le occidente sta disunite.  Condi Rice diceva
al Senato [del Statos Unite]  que "le tempore pro le diplomatia es ora."
Si il vos place, me sparnia. Le tempore pro le diplomatia esseva duo
annos ante ora. Nos esserea tanto plus melior si le integre Union
Europee urgeva ora que le irakis debe votar, e usava su proprie
legitimitate moral in le mundo arab pro delegitimizar le insurgentes.
Le occidente dividite es un real liabilitate.

"Le plus importante menacia [al occidente] es le terrorismo islamic,"
diceva Bernard Kouchner, fundator de Medicos sin Bordos, e uno del
pauc intellectuales francese pro appoiar le deponimento de Saddam
Hussein.  Isto non es un guerra contra le religion de Islam, ille ha
facite emphasizar, mais contra un minoritate de moslemes violente e
fascista. "Nos [in le occidente] ha semper essite alliate contra le
fascismo," mais al hora actual, contrari a lo que occurre in Bosnia,
"nos es a parte."

Kouchner blasma Paris pro haber essite troppo preste a menaciar
un veto al N.U.  e blasma mesmo plus le equipa de Bush pro haber
essite troppo preste de facer le guerra sin un real alliantia, e pro
misgerer le irak post le guerra.  Al minus ille es preoccupate con
le question. Le majoritate de su compatriotas, il es mi impression,
spera que Bush va faller in Irak, a fin que le fines non jammais va
justificar le medios. Il es multo stupefacente, quando on considera
que le Europa, con su grande minoritates moslem, ha besonio del
victoria del moderatos  in le guerra de ideas in Islam, multo plus que
le America.

Io passava le tempore le matino de venerdi in un interview de duo
pueras francese moslem de 18 annos in le districto de immigrantes
de Paris de St. Ouen. (Illo es circa 3.2 km del schola ubi in le martio
de 2003 un puera moslem francese, qui ha refusate adornar se con
un velo, esseva pulsate in un receptaculo de immunditas per tres
juventutes moslem, qui alora ha lanceate cigarettes accendite in illo,
e ha claudite le coperculo).

Ambe pueras que io ha interviewate portava velos, e una equalmente
portava un complete vestimento de capite a pede como in Afghanistan;
una esseva de parentes egyptian, le altere de parentes tunisian, mais
ambe esseva nascite e elevate in Francia.  Que ha io apprendite? Io
ha apprendite que illas ha obtenite tote lor novas del TV  Al-Jazira,
proque illes non habeva fide in le TV francese, que le persona que illas
admira le plus es Osama bin Laden, proque ille defende le Islam, que
le martyrio per suicidio esseva justificate proque il non habeva plus
gloria que a morir in defensa de Islam, que illes se videva como
principalmente moslemes, e cititanos francese solmente in le ultime loco,
e que tote lor amicos habeva le mesme opiniones.

Nos non esseva in Kabul.  Nos stava foras lor schola public secundari
francese--un breve viage del Turre de Eifel.

Stan Mulaik