'Mente pote quitar corpore'

ROTTERDAM, 19 SEPT. Ora il ha essite scientificamente provate: le
experientia que le mente pote quitar le corpore existe vermente.

Il es un experientia sovente discutite in circulos esoteric e
parapsychologic: le experientia que le mente quita le corpore. Sovente,
personas con un tal experientia 'out of body' conta que illes poteva
reguardar lor corpore desde le alto. Per examination de un patiente
epileptic in Suissa ha ora essite trovate un area cerebral que in caso de
stimulation evoca precisemente un tal experientia: le gyro angular dextere,
un circumvolution in le cortice al bordo del lobo occipital. Isto annuncia
le periodico Nature hodie.

Durante minime stimulation electric del area in question, le patiente de
epilepsia de 43 annos (qui non habeva jammais anteriormente habite un
experientia de emersion) diceva que illa se affundava in le lecto o cadeva
de un grande altitude. Stimulation plus forte causava a illa sentir se
flottar duo metros supra le lecto e vider se mesme jacer in lecto "mais io
pote solmente vider mi gambas e le parte inferior de mi corpore".

Quando on demandava al femina de reguardar attentivemente su gambas durante
un tal stimulation, illa reportava que illa videva su gambas devenir plus
curte. Si su gambas esseva plicate il semblava que illos approximava su
facie rapidemente, e alora illa tentava evitar su gambas. Le mesme occurreva
si on demandava a illa de reguardar su manos.

Ex le facto que stimulation duce non solmente a emersion mais etiam a
illusiones anatomic (de exclusivemente le proprie corpore) le neurologos
suisse deduce que il tracta de un distortion del imagine del proprie
corpore. Ex altere recercas esseva ja cognite que le gyro angular joca un
rolo in le imagine del corpore. Experientias de emersion e cambios de
corpore illusori pote anque disparer si le persona in question proba
inspectar plus proximemente le corpore distante o le parte del corpore
cambiate. Possibilemente tal experientias ha dunque lor origine in un
distortion specific del processamento de perceptiones sensori.

Iste resultatos corresponde con le conclusiones del parapsychologo britannic
ben cognite Susan Blackmore, qui ja in le annos octanta constatava que
emersiones sovente occure si information sensori es limitate o es ignorate.
A causa de iste distortiones le cerebro es fortiate de construer un imagine
coherente de altere elementos, como le memoria.

Nulle experientia de emersion que Blackmore examinava dava causa pro assumer
que le mente habeva realmente quitate le corpore. Etiam tote le casos
classic que sempre surge in le litteratura se monstrava post recerca
historic ulterior de non haber fundamento.

Fonte: NRC Handelsblad del 19 de septembre 2002
http://www.nrc.nl/buitenland/artikel/1032411429062.html

Traduction del nederlandese de Martijn Dekker