Anglese Non Se Parla Aqui!

Ben que in le Statos Unite il ha populationes de minoritates qui
parla linguas extranee altere que le anglese, le majoritate del
population non ha accesso a iste communitates pro apprender lor
linguas.  Isto es specialmente ver de studentes in le universitates.
Mais le universitates equalmente ha studentes de multe partes del
mundo, e on pote audir plure linguas extranee quando on promena
per un campo universitari o in le cafeteria de su centro pro
studentes.

Mais universitates, que tamben insenia le linguas extranee, ha
decidite usar a lor avantage le parlantes de linguas extranee intra
lor organismos de studentes.

In le Statos Unite le espaniol e francese es le linguas extranee le
plus popular in le universitates.  E il ha studentes qui veni de
paises ubi le francese e espaniol se parla.

Al Universitate de Georgia in le parve urbo universitari de Athens,
Georgia, circa 80 kilometros al est de Atlanta, le universitate ha
dedicate un residentia de studentes al creation de ambientes in
que solmente espaniol o francese es parlate.

Jessica Dalton e Heidi Orantie ha prendite location in un tal
residentia pro un sol ration:  pro le opportunitate de parlar le
francese.

Heidi de 22 annos es un nativo de Finlandia cuje familia veniva
a Marietta, Georgia quando illa esseva un infante.  "Il es bon a
esser capabile de usar le francese", illa dice.

Dalton, de 22 annos tamben, cuje materia principal es le pathologia
de parola, ha un materia complementari de francese.  Illa non
ha matriculate se in un curso de francese iste semestre. Assi le
opportunitate de habitar un residentia ubi tote le studentes in
su corridor parla le francese es un bon via pro mantener su
habilitate con le francese.

Le residentia es cognoscite como le Residentia Mary Lyndon.  Un
dozena de studentes parla le francese a un latere del Residentia,
durante que 18 altere studentes al altere latere parla le espaniol.

In addition al sessiones de conversation, pro le qual cata studente
recipe un hora de credito academic, illes pote reunir se in lecturas
pertinente a lor linguas, in repastos e eventos cultural, como le
_baile_ de sabbato passate, o dansa, al Club de 40 Wattes in le
centro de Atlanta.

"Nos vermente vole provider studentes con le opportunitate de apprender
de differente culturas in un ambiente que provide comprension del
cultura, e in mi opinion, le immersion in le lingua es le strata
rapide a aquello," diceva Tom Dyer, vice-presidente pro le instruction,
qui es le puncto del lancia del effortio con le appoio de Jim Day,
le Director de Residentias, e officiales in le Collegio Franklin
del Artes e Scientias.

Ille diceva que le universitate es multo forte in un varietate de
linguas, e le administration ha le sperantia que le communitates
de francophonos e hispanophonos es solmente le comenciamento del
via a promover immersion linguistic e cultural intra lor studentes.

Al Universitate de Georgia studentes debe posseder alcun habilitate
con le francese o le espaniol ante que illes es admittite al
Residentia Mary Lyndon.  Un cocina esseva constructe al prime
nivello del residentia pro facer possibile que le studentes pote
cocer nutrimentos de lor respective culturas.  Un sala de seminario
esseva tamben constructe presso le cocina pro classes e lecturas.

Il ha tamben un camera de computatores con 4 computatores e software
lingual - dictionarios, encyclopedias, e historias de varie paises
ubi le francese e le espaniol se parla.  Le studentes usa iste
camera pro compler lor lectiones.

Durante que il ha conversationes informal per cata die, il ha
specific tempores formal tamben.  Le hora de conversation espaniol
- il ha duo per septimana - es tanto animate e aperte que il ha
attrahite studente Karen Cantley 22, de Monroe, Georgia.

Illa non habita le residentia Mary Lyndon e illa non recipe credito
academic, mais illa incontra hispanophonos un su empleo a Wal-Mart
(un magazin in le urbo) e vole meliorar su habilitate in parlar
con illes.  Cantley apprende de altere studentes e le residente lingual
Eric Williams.

Mary Thomas es un altere residente de Residentia Mary Lyndon.  "Tote de
nos ha un interesse commun in parlar espaniol," illa diceva.  Illa
parla le espaniol repetitemente con su companion de camera, Catrice
Jackson, de Decatur, Georgia.  "Mais io equalmente ha apprendite
de gruppos musical e altere aspectos.  E il ha date me multe
opportunitates de practicar le espaniol e de meliorar me."

Basate super un articulo per Rebecca McCarthy in le Atlanta Constitution
de 21 februario 2001.  Scripte per Stanley Mulaik in Interlingua