Alcun parolas a Stan (e a quicunque vole leger los):

[Bent:] Presentar lo como si illo poteva haber essite
scribite assi per Gode ipse pare pro me plus tosto como un
disrespectuose offensa post mortem.
[Stan:] Io pensa que Bent vide malicia ubi illo non existe.
    - Io vide nulle malitia, solmente lo que pro me es
conducta impolite. Io regretta que tu non ha comprendite lo
que io voleva dicer: "Gode esseva un personalitate unic e
esseva vastemente identificate con su textos in un
interlingua modellic. Si on vole citar le in interlingua,
non scribite per ille ipse o in un stilo multo proxime al
sue, on ha un obligation moral a mentionar que illo es un
traduction e per qui."

[Stan:] Bent sembla creder que le attitude de Dr. Gode super
su stylo de interlingua esseva intolerante de variantes o de
revisiones del IED o su grammaticas.
    - Estranie conclusiones!

[Stan:] Io esseva un amico personal de Dr. Gode,
    - Exceptionalmente io va mentionar: Anque io esseva un
amico personal (e collaborator proxime) de Gode, mesmo
durante le multe annos de tu "absentia". In mi archivo se
trova multe litteras ab ille, usualmente comenciante per
"Car amico"; io me permitte citar al hasardo:
    [G:] "Gratias pro vostre littera [...] Le termino
'gratias' non es adequate sed io trova nulle altere pro
exprimer mi gaudio e mi satisfaction."
    [G:] "Multe gratias ... Io nota con gaudio que io ha
ancora amicos in Danmark ..."
    [G:] "Io es felice de poter accurtar iste responsa,
viste que ben tosto nos va poter occupar nos a vive voce de
resolver le problemas del mundo." [Incontro in Copenhagen
1963.]
    [G:] "Io me trova enthusiasticamente de accordo con
vostre proponimento. Mi responsa [...] pote esser
summarisate in le duo acclamationes: 'Gratias a Deo!'
'Gratias a Andersen!'"

[Stan:] ... e io sape que isto non es ver. Tu debe
comprender que Gode esseva tolerante ...
    - Tu "sape" e io "debe comprender". Bon saper isto.

[Stan:] Dr. Gode non esseva totemente felice con le europeos
quando ille ha inviate les iste essayo, su "Manifesto".
Multe de illes non comprendeva le base scientific e
professional ...
    - Ben possibile, ma permitte me ancora citar ex litteras
ab ille:
    [G:] "Il me pare que le maniera in que vos promove le
exploitation de interlingua es le sol possibile o al minus
rationabile."
    [G:] "Io non essera surprendite si le futuro de
interlingua trova su base in le nord, le paises frigide, ubi
le enthusiasmos es lente (e duratori)."

Al fin, passages ex mi ultime littera ab Gode, un mense ante
su morte:
    [G:] "Como vos lo sape, io perde nulle occasion pro
asseverar que ni le un ni le altere es le "fabricator" de
Interlingua, sed isto non significa que io non es
sufficientemente arrogante pro reguardar Interlingua como le
obra de mi vita. [...]"
    [G:] "Per omne isto io vole suggerer que mi attitude
verso Interlingua - in despecto de omne lo que io ha
scribite e dicite in un senso apparentemente contrari - es
le attitude de un patre verso su filio. [...] Sed,
fortunatemente, quasi omne le prominente personalitates in
le movimento pro Interlingua ha plenmente comprendite le
ultime incambiabile principios historic, philosophic,
organic per medio del quales Interlingua ha essite derivate.
Isto me rende felice e pro isto io es grate."
    [G:] "Si in recente annos le puncto de gravitate in lr
activitate pro Interlingua se ha transferite ab America ad
le ancian continente, isto non significa que le spirito in
le qual nostre movimento es dirigite ha essite cambiate. In
transferer le functiones del leaders a vos e vostre socios
io ha le certitude que le nove leaders es non solmente
personal amicos mie sed etiam representantes del typo de
pensar que io ha representate durante multe annos.
    Voa comprende que iste stato del cosas es pro me un
fonte de grande satisfaction."

Bent

======================================================
Pro disabonar te del lista, invia un message a
[log in to unmask] con le texto:

  UNSUBSCRIBE INTERLNG

o visita le sito del lista:

  http://maelstrom.stjohns.edu/archives/interlng.html
======================================================
Visita le sito official del Union Mundial pro
Interlingua:

  http://www.interlingua.com/
======================================================