Es difficile guardar se contra false interlinguas - anque in Internet.
Le notion "interlingua" es obvie pro un inter-lingua. Le majoritate del
"interlinguas" totevia sembla esser obscur projectos de traductiones
machinal, probabilemente non cognoscite ultra circulos stricte.

Ma illo sublinea le facto que nos debe esser plus visibile - anque in
Internet. Le plus de paginas domestic, le melior. Io assi habeva le
gaudio de cercar "interlingua" in le grande libreria electronic
Amazon.com. Io obteneva 17-18 titulos, del quales solmente un singule
non esseva le ver interlingua.

Quanto al lista de false interlinguas que Paolo Castellina mentiona, le
adresse svedese del firma Interlingua AB non es si mal. Le firma es un
membro del Societate Svedese pro Interlingua, e iste collaboration
assecura que le firma anque pote livrar traductiones in interlingua si
desirate.

Quanto al schola de linguas, InterlinguaJersey, io lo contactava ante
quatro-cinque annos post haber legite un annuncio in le septimanal
anglophone The European. Anque Peter Gopsill, presidente del Societate
Britannic pro Interlingua, lo contactava informante lo extensemente
super le ver interlingua. Interlingua Jersey solmente insenia anglese ma
trovava interessante le ver interlingua. On totevia non ha planos de
introducer cursos de interlingua in Jersey - nos demandava!

Conclusion: Nos debe esser active e contactar omnes qui usa le notion
interlingua pro - preferibilemente - persuader les a cambiar le nomine,
alternativemente simplemente informar les super le existentia del ver
interlingua. Isto da sovente resultatos positive!

Bon Pascha a omnes!

Thomas Breinstrup