Car amicos,

De retorno desde un die, io vole contar vos de nostre excursion a bicycletta
secundo le fluvio Mosa (Ned.: Maas, Fr.: Meuse) in le parte sud-est de
nostre parve pais.

Jam desde multissime annos mi sposa e io face tal excursiones a bicycletta,
non solmente in Nederland, ma anque in Belgica, Francia, e super toto in
Anglaterra (Suffolk, Norfolk, Lincolnshire, Humberside, etc.). Le ultime
annos nos ha restringite le durata a 3 - 7 dies, sed antea la durata esseva
sovente 4 - 5 septimanas. Alora nos passava le noctes in nostre tenta que
nos poteva transportar super le bicyclettas.

Nostre bicyclettas es bicyclettas special que on nomina hic "randonneurs".
Illos es ultralegier, extrememente solide, e dispone de rotas multo stricte e
de "derailleurs" de 18 velocitates.

Ante 5 annos nos ha abandonate nostre tenta. Nunc nos resta in Nederland
e utilisa un systema de "lecto e jentaculo", organisate per un club que se
appella "Amicos del Bicycletta". Iste club ha circa 1200 adresses de
personas qui dispone de un o duo cameras libere.

E nunc le viage!

Le 8 de julio nos ha cyclate al station ferroviari de Utrecht que es situate
a 8 kilometros de nostre casa. In Utrecht nos (e nostre bicyclettas) ha
prendite te traino usque a Nijmegen (a 80 kilometros de Utrecht) in le est
de Nederland.

In Nijmegen ha comenciate le ver excursion. Al exception del prime parte
in le urbe Nijmegen e postea in le urbe Roermond, nos ha sequite parve
camminos tranquille e pistas cyclabile, que es le plus proxime al fluvio
magnific Mosa.

Le vallea splendide con su villages ancian e pictoresc, le bordos del
camminos e le pratos con lor flores abundante e multicolor, le numerose
aves aquatic e alteres, nos ha date un sentimento de gaudio e de
satisfaction. De tempo a tempore le cafes rural nos ha providite de
refrescamentos benvenite e in le fin del die nos ha trovate un bon
restaurante al bordo del fluvio pro un repasto excellente e a basse precio.
A novem horas in le vespere nos ha arrivate al casa de nostre prime
hospites, un familia multo cordial.

Le secunde die nos ha cyclate solmente un curte distantia, circa 30 kilo-
metros, nam nos ha passate le plus grande parte del die in le celebre
jardines meraviliose del castello de Arcen. Hic on pote gauder de un ver
paradiso de rosas de tote sortas e de numerose altere belle flores, que es
plantate inter parve lacos, boscos e roccas. Un grande edificio de vitro
contine un parco de plantas subtropical.
Le sex horas esseva plen de gaudio, sed anque extrememente fatigante.

Le tertie die nos passava le plus belle parte del fluvio: Panoramas
magnific, pratos e boscos del ripas, e camminos ubi automobiles es
phenomenos sporadic ! Durante duo horas nos ha restate in le parve
village Kessel con su belle vistas super le Mosa e con su castello ruinate.
(Le 17 de novembre 1944 le armea german, que se retirava, ha destruite
un grande parte del edificio imponente.)

Per le ferry de Kessel nos ha transversate al altere ripa e post haber
passate a transverso del urbe Roermond, nos ha attingite nostre ultime
adresse in Linne, un parve village situate magnificamente in un grande
meandro del Mosa.

Finalmente le quarte die nos ha visitate le region al est de Roermond,
le vallea del parve riviera Roer e le reserva natural "Meinweg". In le
vespere nos ha retornate a Roermond, ubi nos ha prendite le traino
a Utrecht. Alicun minutas ante medienocte nos ha entrate in nostre
proprie casa in Bilthoven, fatigate ma multo contente.


Salutes de Piet Cleij