Car amicos,
nos que habeva le opportunitate de vader a Strasbourg
certamente non oblidava que il ha multe altere amicos que
non lo poteva e que multo expecta un rapide reporto super
le Conferentia. On necessa solmente un poco de tempore in
plus, proque plure de nos es ancora in vacantias alicubi e
certemente illes scribera assi tosto quando illes retornara
a lor proprie casa e computator. Nos habera como semper un
reporto official in le proxime menses.
Pro lo que me concerne, io habeva le placer de retornar a
in mi casa con Frank Pfaff, cognoscer le e appreciar le
melio, facer planos pro nostre nove pagina domestic
official e facer le vider pro le prime vice le parte de
Helvetia in le qual io vive. Ille mesme facera un reporto
super isto.
Le conferentia de Interlingua, iste es mi opinion, non
esseva tanto importante pro le papyros (...) que illo
produceva, ma pro le preciosissime opportunitate de
practicar interlingua parlate, de consolidar le amicitate
con personas que on vide solmente cata duo annos, e de
cognoscer nove interlinguistas, inter le quales plures
deveniva tal per le uso del interrete ipse. Le "aspecto
human" esseva ancora plus importante, io pensa, del
"aspecto official" e del discursos: ergo mesmo le belle
excursiones que nos faceva in Alsatia esseva importante,
i.e. illos non esseva solmente tourismo!
Inter parenthese, io mesme faceva un film video del
Conferentia. Io ha sex horas de registration! Si alcuno
volerea reciper un cassetta video de illo (PAL-VHS), quando
io trova le tempore de editar lo e arrangiar lo bellemente,
io potera inviar lo a qui me lo demanda. Non sia tamen in
haste...
Le protagonista involuntari del Conferentias esseva - io
pensa - super toto le juvene Petjo de Bulgaria. Un tal
juvene plen de talentos es vermente promittente mesmo pro
nostre movimento. Ille cognosce plure linguas e ille
volerea mesmo cognoscer le parve linguas minoritari de
Europa. Ille parla un Interlingua melodiose e rapide, e
ille sape imitar le accentos de quicunque. Amusante es le
facto que cata uno parla Interlingua con su proprie
accento. On comprende (si on parla correctemente), ma on
necessa un aure accostumate a audir le Ukrainianos parlar
Interlingua! Le proxime Conferentias del 50e anniversario
de Interlingua, habera forsan loco in Sofia (Bulgaria).
Le belle nova es naturalmente le creation de http://www.inte
rlingua.com, le sito official de U.M.I.- Nunc il ha le
essential pro occupar initialmente le spacio, ma
gradualmente, con le adjuta de Frank, Jan, io, e
Florin+Simona illo continera: 1. Le bibliographia de Frits
+ un maniera facile de ordinar e pagar su libros. 2. Un
curso multo attrahente de Interlingua. 3. Breve textos
interessante. Pro haber iste sito on debe pagar circa 450$
cata anno. Alcunes offereva lor adjuta private, ma UMI e le
Fundation Bakonyi vadera pagar pro conservar iste sito.
Omne contributiones (mesmo practic e de know-how) essera
benvenite.
Multo on debe ancora facer pro Interlingua. Dotar, p. ex.
le major linguas de vocabularios (grande) e manuales,
augmentar le interessatos favorabile (specialmente inter
linguistas, politicos e "personas importante"), acquirer
stato consultative in le E.U. etc. Le situation es
favorabile. Per exemplo on diceva nos al Parlamento Europee
(quando nos lo visitava) que Interlingua es absolutemente
compatibile con le principios e ideales del Union Europee,
illo facerea lo sparniar milliones de moneta pro
traductiones, e illo contribuerea, plus que qualcunque
altere lingua al relationes amicabile inter le populos.
Optime, nonne?
Pro le momento io termina hic. Naturalmente il haberea
altere cosas a adder, ma non time que nos omnes continuara
a parlar in re nostre Conferentia de Strasbourg.
Car salutes, Paolo.


Paolo Castellina
CH-7604 Borgonovo (Switzerland)
[log in to unmask]
http://www.poboxes.com/pcastellina
http://www.interlingua.com