RECERCANTE UN HEREDITAGE VIKINGESE

Secundo un articulo per Svein Michelsen in le web scientistas ora
studia le historia genetic de un insula remote brittanic pro
recovrar le evidentia super le maniera in que Brittania esseva
populate e que pote mesmo adjutar le medicos combattar le
maladias moderne.

Scientistas al Universitate de London ha publicate un articulo
super un studio que ha pro su objecto a revelar evidentia genetic
del invasion del vikings in le Insulas Orkney in le 800s.

Per studiar le radices genetic de su poplation, le principal
author del studio, Dr. David Goldstein, dice que nos pote
revelar le factos super le historia human que le archeologia
e le fontes scripte es incapace de recovrar.  Tal studios
equalmente es importante proque illos pote adjutar recercatores
isolar le genes que influentia le maladias commun tal como
le maladias del corde.

Ben que on ha necun dubitos super le influentia linguistic e
cultural del vikings, le studio totevia esseva intendite de
monstrar le extento a que le vikings se intermaritava con le
population indigine del insula.  Specimenes de sanguine del
habitantes mascule del insulas e gruppos de controlo in Irlanda,
Norvegia, Wales, e Nederland esseva examinate pro recovrar le
hereditage del chromosoma Y.

Trovatas Inexpectate

Goldstein trovava que il ha un forte influentia scandinave intra
le 71 habitantes del insula examinate--evidentia que il ha multo
sanguine de vikings intra le habitantes, qui hodie non es tanto
fer como lor ancestres.

Mais quando le scientistas examinava le hereditage celtic del
mascules del Insulas Orkney contra le gruppos de controlo del
gallese e irlandese, illes recovrava un similaritate remarcabile
in le configurationes de genes in le linea mascule.  Le similaritates
suggereva que le populationes al margines celtic del Insulas
Brittanic habeva in commun characteristicas del chromosoma Y
que existeva ante le invasion del insulas per le saxones in le 400s.

Iste resultato esseva confirmate quando le geneticistas faceva
comparationes del specimenes irlandese e gallese con aquellos
del vascos, un populo anciente habitante le regiones al frontiera
inter Francia e Espania.  Le studio concludeva que le vascos,
le irlandese e le gallese constitue un communitate cuje
configurationes de genes del Y chromosoma es plus affin al un
le altere que a altere populationes europee.

Totevia, que es le evidentia del feminas?

Le feminas se misceva inter le populationes.

In contrasto con le chromosoma Y celtic, Goldstein trovava un
similaritate inter le Insulas Brittanic e le resto del nord de
Europa in le chromosoma X, i.e. del feminas.  Le feminas augmentava
le diversitate genetic del Insulas, commenciante approximatemente
8.000 annos in le passato.  Goldstein explica que isto possibilemente
se debe al facto que le homines controllava le proprietate del
terra e comportava feminas con illes e a vices mesmo excambiava le
feminas como commoditates.

Le Insulas Orkney esseva un bon puncto a commenciar un studio, dice
Goldstein, proque il habeva solmente duo influentias discernibile
super le population--celtic e viking.  Recercar le composition
genetic del resto del Insulas Brittanic--un projecto que va finir se
in le proxime sex a octo menses--va provar esser un labor plus
difficile, proque le influentias del romanos, normanos, saxones,
e norse deberea disimbroliar se.

Post le trovatas del Insulas Orkney, le recerca va continuar a
centrar se in areas que pote esser associate historicamente a
populationes specific.  York, o Jordvik, como le citate esseva
appellate per le vikings, es un del 20 locationes que le equipa
de recercatores de Goldstein plana visitar in futur menses.  Le
scientistas spera que illes pote collectionar 2.000 specimenes
pro mappar le typos genetic que constitue le population brittanic
de hodie.


Stan Mulaik